Էլ Մորիայի այսօրվա ավարտական Ուղերձը

Ես ձեզ շնորհավորում եմ Լույսի ուժերի հաջողության կապակցությամբ...

Վեհապետ Մորիա

29 հունիսի, 2013 թ.

ԵՍ ԵՄ Էլ Մորիան...

Ուրախ եմ ձեզ ողջունել այս օրով...

Ես տեսնում եմ ձեր անեղծ հետաքրքությունը մեր կողմից տրվող Ուսմունքի նկատմամբ, և բավարարված եմ, որ, չնայած դժվարություններին՝ մենք կարողացանք ավարտին հասցնել մեր Դեսպանորդի միջոցով տրվող Ուղերձների այս շրջանը:

Այո, սիրելինե՛րս, ամեն անգամ մենք ստիպված ենք լինում հաղթահարելու նշանակալից դժվարություններ, որպեսզի իրականացնենք մեր Ուսմունքի փոխանցումը: Ցավոք, մեզ հակադիր ուժերի դիմադրությունը հասել է շիկացման այնպիսի բարձր կետի, որ Ուղերձների ամեն մի շրջանի համար մենք վիթխարի ջանքեր ենք գործադրում: Եվ ամեն անգամ մենք հույս ենք կապում, որ մեր ջանքերն ու էներգիաները չեն անցնի ավազի տակ, այլ կյուրացվեն ձեր կողմից:

Այս անգամ մեր Դեսպանորդի միջոցով տրվող Ուղերձների շրջանը մենք ավարտին  ենք հասցնում Գերմանիայում...

Եվ մենք լիահույս ենք, որ այն էներգիան, որն արտազատվում է մեր Ուղերձների ընդունման վայրում, կասիմիլացվի այն մարդկանց կողմից, ովքեր ունակ են յուրացնելու Բարձրագույն աշխարհների էներգիաները:

Մեր ջանքերին դուք պետք է արձագանքեք Ուսմունքը տարածելու պատրաստակամությամբ: Միայն այն դեպքում ենք մենք փոխանցում մեր Ուղերձները, երբ գտնում ենք Սպասավորությանը պատրաստ սրտեր, և համոզված ենք լինում, որ մեր Խոսքի էներգիան զուր չի կորչի:

Մենք ուզում ենք, որ այն էերգիան, որն արտազատվում է Ուղերձների ընդունման ամեն մի շրջանում, հավասարաչափ բաշխվի երկրագնդի մակերևույթով: Ուստիև մանրակրկիտ կերպով ընտրում և նախապատրաստում ենք Ուղերձների ընդունման  հերթական շրջանի վայրը:

Ոչինչ պատահական չի լինում: Ամեն ինչ խնամքով պլանավորվում է մեր կողմից, և արտազատված էներգիայի ամեն մի էրգն օգտագործվում է, որպեսզի փոխվի երկրագնդի իրադրությունը, և ֆիզիկական ոլորտում բեկում տեղի ունենա Լույսի ուժերի օգտին:

Այսօր ես պետք ձեզ ասեմ, որ նախկինում երբեք մենք չէինք հանդիպել այնպիսի դիմադրության, ինչպիսին եղավ Ուղերձների փոխանցման այս շրջանում: Իրավիճակը բարդացրեց և այն, որ մենք չգտանք այն մարդկանց, ովքեր կարող էին Ուղերձների ընդունման ամառային այս շրջանում հոգ տանել մեր Դեսպանորդի համար:

Ամեն անգամ կրկնվում է նույն իրավիճակը. մենք գտնում ենք մեր այն հետևորդներին, որոնք մարմնավորվելուց առաջ պարտավորություն էին վերցրել ծառայելու Եղբայրությանը և մեր Դեսպանորդին, և ամեն անգամ, երբ գալիս է այդ ծառայության պահը՝ մեր սաները գտնում են ավելի կարևոր գործեր և մեկը մյուսի հետևից դուրս գալիս Ուղուց:

Մենք սոսկ մի հազարամյակ չէ, որ դիտում ենք նման պատկեր: Քանի դեռ մենք հեռու ենք գտնվում, և մեր էներգիաների ուղղակի փոխանցում տեղի չի ունենում՝ մեր շատ սաներ իրենց սփոփում են այն պատրանքով, որ իրենք Ուղու վրա են և ծառայում են Եղբայրությանը: Սակայն հենց որ մենք սկսում ենք մերձենալ և հնարավորինս մոտ ենք հայտնվում ձեզ, դուք շուտափույթ ավելի կարևոր գործեր եք գտնում և մեկդ մյուսի հետևից հեռանում՝ մեզ մենակ թողնելով մեր Դեսպանորդի հետ:

Պաշտելինե՛րս, Աստված միշտ կհոգա մեր Դեսպանորդի համար. Այս Դեսպանորդը գտնվում է իմ անձնական պաշտպանության և հովանավորության տակ: Բայց արդյո՞ք ինքներդ ձեր հետագա մարմնավորումների ժամանակ ուրիշ այսպիսի հնարավորություն կունենաք ծառայելու համար...

Մեկընդմիշտ հիշեցե՛ք. ոչ թե դուք եք շնորհ անում՝ ծառայելով մեր Դեսպանորդին, այլ մենք և մեր Դեսպանորդն ենք ձեզ պատիվ անում՝ թույլ տալով, որ ծառայեք Եղբայրությանը:

Ինչպես այս, այնպես էլ ուրիշ շատ Աստվածային ճշմարտություններ դուք գլխիվայր եք շուռ տվել:

Սակայն կա Աստվածային կարգ, և կա Աստվածային Օրենք: Եվ, որքան էլ փորձեք ձեզնից հեռացնել Աստվածային Օրենքը, այն մշտապես շարունակում է գործել:

Եվ ամենագլխավոր բանը, որին մենք հասնում ենք մեր Ուղերձների ամեն մի փոխանցման ժամանակ՝ որոմը հատիկից ջոկելու գործն է լինում: Երբ ձեզ են մոտենում Աստվածային էներգիաները, մենք ամենայն ակներևությամբ կարող ենք դատել ձեր կատարած քայլերից, թե իրականում ում կողմից եք  հանդես գալիս: Մի կողմ են դրվում ձեր բոլոր այն խոսքերն ու հավաստիացումները, որ հավատարիմ եք Եղբայրությանն ու մեր Դեսպանորդին: Դուք մոռանում եք ձեր հավատարմության, ձեր սպասավորության և ձեր պարտավորությունների մասին և մղվում դեպի արտաքին աշխարհից եկող  հենց առաջին հրապուրանքը: Եվ ձեր մարմնական խելքը միշտ ձեզ բացատրում և ապացուցում է, թե ինչու եք ճիշտ վարվել՝ նախընտրելով ձեր էգոյի քմայքին բավարարություն տալը,  փոխանակ շարունակելու Ուղով ձեր առաջընթացը:

Ձեզնից շատերը նույնիսկ չեն էլ կասկածում, որ Ուղի վերադառնալու համար սա իրենց վերջին հնարավորությունն է: Դուք նույնիսկ հաշիվ չեք տալիս ինքներդ ձեզ, որ ձեր այս ընտրությունը ճակատագրական է: Շատ ողբալի բան է դա գիտակցելը: Առավել ևս, որ շատերդ մեր այս Ուղերձները կարդում եք համարյա առաջին օրվանից սկսած:

Աստծուն, սիրելինե՛րս, հնարավոր չէ ծաղրել: Բայց դուք մեկը մյուսի հետևից ինքներդ եք կատարում ձեր ընտրությունները: Եվ Աստված հասնում է իր գլխավոր խնդրի լուծմանը. մարդկային անհատների միջից ընտրում է նրանց, ովքեր պատրաստ են անցնելու էվոլյուցիայի հաջորդ աստիճանին, իսկ մյուսները տեղ են զբաղեցնում մարդկային պատմության անհաջողությունների էջերում:

Այնտեղ, որտեղ գտնվում է մեր Դեսպանորդը, միշտ շրջակա իրականության մեջ տեղի է ունենում Լույսը խավարից ջոկելու գործընթաց, և առաջին հերթին՝ մարդկանց հոգիներում: Դա Մեծ Սպիտակ Եղբայրության Դեսպանորդի պատմուճանի առանձնահատկությունն է, և այն անքակտելի է, ինչպես Աստծո և Վեհապետների Խոսքը, որը կրում է մեր Դեսպանորդը:

Իսկ հիմա ես պետք է ասեմ ձեզ, որ մեր Ուղերձների այս շրջանն ավարտված է: Եվ մենք բավարարված ենք նրանով, որ այս անգամ մեզ հաջողվեց մեր դեսպանորդի միջոցով ճառագել աննախադեպ քանակությամբ Լույս:

Ես ձեզ շնորհավորում եմ Լույսի ուժերի այս հաջողության կապակցությամբ...

Ես մաղթում եմ, որ հասնեք գիտակցման այն աստիճանին, որ կարողանաք ձեր էության ներսում և արտաքին աշխարհում որսալ  խավարի ուժերի ամենամանր դրսևորումները:

Ես մաղթում եմ նաև, որ ձեր հավատն ու հավատարմությունը Եղբայրությանը այնքան ամրանան, որ ձեզ դուրս բերեն երկդիմի աշխարհի թակարդների միջից և ձեր հոգուն թույլ տան վերադառնալու Տուն՝ Աստծո մոտ...

Այս Ուղերձը փոխանցելու ընթացքում ես կնիք եմ դնում մեր Ուղերձների այս շրջանում ճառագված ամբողջ Լույսի վրա, որպեսզի նրանք, ովքեր Լույսից չեն, չկարողանան դրանից օգտվել:

Եղիցի...

Ի կատար է ածված...

Կնքված է...

ԵՍ ԵՄ Էլ Մորիան

Տատյանա Միկուշինա, 2013 թ.

թարգմանեց Խ. Մանասելյանը

Պյութագորաս-Կութհումիի այսօրվա Ուղերձը

Աստվածային Ճշմարտությանը հասու են դառնում ոչ թե արտաքին փնտրտուքով, այլ ներքին որոնումներով

Կութհումի

28 հունիսի, 2013 թ.

ԵՍ ԵՄ Կութհումին: Այսօրվա օրով մենք կքննարկենք այն Ուսմունքի ևս մի քանի դրույթները, որը Երկրի մարդկությանն ուսուցանում են Իմաստության Տիրակալները:

Որոշակի ժամանակ պահանջվեց, մինչև որ կարողացա աշխարհների միջով մերձենալ ձեզ: Ինչպես աշխարհների փոխազդեցության, այնպես էլ մեր Ուղերձների փոխանցման գործընթացները դեռևս բավարար չափով ուսումնասիրված չեն աշխարհիկ գիտության կողմից: Եվ դա կապված է նաև այն բանի հետ, որ գիտությունը կանխակալ է մոտենում այն ամենին, ինչը նրա տեսակետից կապված է գերբնական երևույթների հետ, որոնք բացատրելի չեն ֆիզիկական աշխարհի և նրա օրենքների տեսանկյունից: Կանցնի ևս որոշ ժամանակ, և գիտության միջոցով շրջակա աշխարհը ճանաչելու շրջանակները կընդլայնվեն, իսկ ներկայումս ժամանակակից գիտության մեջ գոյություն ունեցող՝  նուրբ աշխարհը հետազոտող բնագավառը կընդգրկի ավելի լայն տիրույթ: Սակայն դա տեղի չի ունենա ավելի վաղ, քան մարդկային մտքի առաջատարները կհավատան մեր գոյությանը և մշտական կապ կհաստատեն մեզ հետ:

Իսկ մեզ հետ մշտական կապը հնարավոր է միայն այն դեպքում, եթե դուք անկեղծ եք և անկեղծորե՛ն եք հավատում մեր գոյությանը: Դեռ ավելին՝ հավատից զատ անհրաժեշտ է նվիրված լինել Եղբայրությանը և պահպանել այն պայմանների անխախտությունը, որոնց հիման վրա երկարատև ժամանակահատվածի ընթացքում մենք աշխատում ենք մարդկության հետ:

Ձեզնից նրանք, ովքեր ծանոթ են առատորեն սփռված էզոթերիկական գրականության հետ, լիովին կարող են նկատած լինել, որ գրականության այդ ճյուղը բաժանված է իրարից զգալիորեն տարբերվող երկու տեսակի կամ սեռի:

Էզոթերիկական գրականության առաջին տեսակն առնչվում է մարդկանց զանազան հոգեխուզական որոնումներին, որոնք հիմնականում կապված են լինում աստեղային ոլորտի և մենտալ ոլորտի ստորին շերտերի հետ: Դրա մեջ մտնում են նուրբ աշխարհների վերաբերյալ չզարգացած գիտակցությունների տպավորությունները և առանձին անհատների գիտակցության մեջ՝ ֆիզիկական աշխարհին մոտ գտնվող նուրբ շերտերին պատկանող շատ բաների, ուղղակիորեն ասած, անառողջ արտապատկերումը: Դա գրականության վիթխարի մի շերտ է, որը լիովին հանգիստ կարող եք շրջանցել և դրան որևէ նշանակություն չտալ: Դեռ ավելին՝ ես խստորեն ձեզ խորհուրդ եմ տալիս չտարվել այդ տեսակի գրականության ընթերցանությամբ, քանի որ այն կարող է վնաս պատճառել ձեր հոգեկառույցին՝ ձեզ մխրճելով օտարների երևակայության անառողջ թրթիռների մեջ:

Մյուս տեսակի էզոթերիկական գրականությունը հազվադեպ է պատահում ձեր աշխարհում, և ներկայումս իրենից ներկայացնում է ավելի շուտ պատահական, քան թե օրինաչափ երևույթ: Եվ դա հասկանալի է, քանի որ ձեր աշխարհում ներկայումս հաստատված ճշտի ու ստի՝ 10 տոկոսը 90-ի դեմ հարաբերակցությունը կիրառելի է նաև էզոթերիկական գրականության նկատմամբ:

Այստեղ ես մի փոքրիկ ճշգրտում պետք է անեմ: Կապված այն բանի հետ, որ մեզ հակադիր ուժերը ներկայումս ուժեղացրել են իրենց ընդդիմությունը, ճշմարիտ էզոթերիկական գրականությունը ձեր գրադարակների վրա սկսել է առավել հազվադեպ երևալ: Եվ մեկը 99-ի դեմ տոկոսային հարաբերակցությունն արդեն լավատեսական կարելի է համարել:

Նույնիսկ այն դեպքում, երբ ձեր ձեռքն է ընկնում  ձեր կարծիքով մաքուր տեղեկատվության աղբյուր, էլի դուք պետք է զգուշանաք և մանրազնին կերպով փորձեք պարզել այդ հրատարակության հանգամանքները՝ օգտվելով ձեր ինտուիցիայից: Հայտնի շատ հեղինակների գործեր, անցնելով որոշ հրատարակիչների անմաքուր ձեռքերով, փոխվում են անճանաչելիության աստիճան. նման տպագիր արտադրանքի ճշմարտության չափը խիստ նվազում է, և դժվարանում է որոշելը, թե որտեղ են թաքնված ձեզ իրենց ճանկերի մեջ առնող թրթիռներն ու էներգիաները:

Ուստի մարդկության մեծամասնության առումով լիովին արդարացված է ընդհանրապես էզոթերիկական գրականությունից հրաժարվելը, քանի որ կյանքի ներկայիս ռիթմի պայմաններում մարդիկ պարզապես ժամանակ չունեն գլուխ հանելու հում պատրաստուկների այն կույտերում, որնք առատորեն ներկայացված են գրախանութների դարակներում և համացանցում:

Սակայն այստեղ ձեզ մի ուրիշ վտանգ էլ է սպառնում. հրաժարվելով ճանաչելու այն, ինչը դեռևս չի ամրապնդվել մարդկության ընդհանրական գիտակցության մեջ և մարդկային հասարակության մեծամասնության տեսակետից արժանահավատ չէ՝ դուք վտանգում եք ձեզ ընձեռնված հնարավորությունը և չեք օգտվում այն գիտելիքներից ու հանձնարարականներից, որոնք իսկապես ճշմարիտ են, տրվում են մեր՝ Համբարձյալ Վեհապետներիս կողմից և անփոխարինելի են մարդկության էվոլյուցիոն զարգացման ներկա փուլի համար:

Ընթերցող պետք է որ մեր զրույցի այս մասում տարակուսանք ապրի, որովհետև երևի երկար ժամանակ է, ինչ մի հարց է պտտվում նրա գլխում. «Ո՞ր կողմն է ուզում ծռել...»:

Հիրավի՝ վիճակը ողբալի է դառնում: Մի կողմից՝ մենք փորձում ենք օգնության ձեռք մեկնել մարդկությանը և նպաստել փակուղային թվացող իրավիճակից դուրս գալուն, որի մեջ հայտնվել է Երկրի մարդկությունը, և մյուս կողմից՝ մեզ հակադիր ուժերի ակտիվացման հետևանքով, ժամանակի ներկա պահին այնպիսի աղտոտում է տեղի ունեցել մոլորակի տեղեկատվական դաշտում, որ գործնականորեն հնարավոր չէ պարզել, թե որտեղ է ճշմարտությունը, և որտեղ՝ սուտը:

Ցանկացած իրավիճակից ելք գոյություն ունի: Եվ այս իրավիճակից՝ նույնպես: Այս իրավիճակի հանգուցալուծումն ուղղակի մակերեսի վրա է: Ձեր աշխարհում ամեն ինչ իրար է ձգվում ըստ թրթռանքի: Ուստի անկասելի ճշգրտությամբ ձեզ շրջապատող աշխարհում դուք կգտնեք հենց այն, ինչը համապատասխանում է ձեր թրթիռներին: Եվ եթե ձեր թրթիռները ցածր են, ապա, որքան էլ ջանաք մերձենալ ճշմարիտ տեղեկատվության աղբյուրին, հաջողության չեք հասնի:

Բայց ճիշտ է նաև հակառակ պնդումը. եթե ձեր թրթիռները բարձր են, ապա, որքան էլ ջանաք ձեր թրթիռներին չհամապատասխանող գիրք կամ տեղեկատվության աղբյուր գտնել, հաջողության չեք հասնի:

Ի վերջո, ի՞նչ եմ ես կոչ անում մեր այսօրվա զրույցում: Ես մեծ հույսեր եմ փայփայում, որ բոլոր նրանք, ովքեր հիմա կարդում են իմ այս Ուղերձը, կարդում են հենց այն պատճառով, որ իրենց թրթիռների մակարդակը թույլ է տալիս դա անել:

Այժմ ձեզ մնացել է, որ անեք հաջորդ քայլը: Կա՛նգ առեք:

Դադարացրե՛ք ձեր հոգևոր որոնումները:

Ասածս չի նշանակում, որ դուք պետք է ընդհանրապես դադարացնեք ձեր իրական հոգևոր որոնումները, այլ միայն նշանակում է, որ ժամանակն է, որ ընդհատեք արտաքին աշխարհում զանազան տեղեկատվական աղբյուրներ փնտրելու գործը:

Եթե ձեր ինտուիցիան հուշում է ձեզ, որ դուք արդեն գտել եք ճշմարիտ աղբյուր, ապա մի՛ շարունակեք փորձարկել այլ աղբյուրներ: Կանգ առեք մի աղբյուրի մոտ և ջուր խմեք միայն այդտեղից:

Այս առումով կարելի է նմանատիպ օրինակ բերել ձեր ֆիզիկական աշխարհից: Ենթադրենք դաշտում աղբյուր եք փնտրում ձեր ծարավը հագեցնելու համար: Ահա գտել եք մի աղբյուր, որը ձեզ զարմացնում է իր ջրի բյուրեղյա մաքրությամբ ու կատարյալ համով:

 Իմաստուն մարդիկ դադար են առնում նման աղբյուրի մոտ, հագեցնում իրենց ծարավը և դրա ջուրը պահեստավորում իրենց ունեցած տարաներում ու ջրամաններում:

Ոչ այնքան իմաստուն մարդիկ գնում են ուրիշ աղբյուրի ջուր փորձելու: Բայց այնտեղի ջուրը մի փոքր դառնաղի է լինում: Հետո մոտենում են մի ուրիշ աղբյուրի: Այս մեկի ջուրն էլ հոտած է դուրս գալիս: Հաջորդինը՝ ցեխաջուր:

 Նման մարդկանց սպառնում է այն վտանգը, որ այլևս երբեք չեն վերադառնա զուլալ ջրով աղբյուրի մոտ և կշարունակեն նոր աղբյուր փնտրել ու ցեխաջուր խմել:

Ուստի այն պահին, երբ ձեր ողջ էությամբ հասկանում եք, որ ձեր առջև Աստվածային Ճշմարտության մաքուր աղբյուր է, երբեք ուրիշ աղբյուր մի՛ փնտրեք: Քանզի Աստվածային Ճշմարտությունը միակն է, և դրան կարող եք հասու դառնալ ոչ թե արտաքին փնտրտուքներով, այլ ներքին որոնումներով:

Արտաքին գիտելիքից պետք է ի վերջո անցում կատարել ներքին գիտելիքին: Արտաքինը միայն խթան է ձեր գիտակցության համար, որպեսզի սուզվեք Աստծո հետ հաղորդակցության այն տարածությունը, որն առկա է ձեր սեփական էության ներսում:

Հավանաբար ես այսօր ձեզ ձանձրացրի իմ դատողություններով: Բայց ես լիահույս եմ, որ այն քչերը, որոնց համար ես այսօր տվեցի իմ այս Ուղերձը, կլսեն ինձ և կօգտվեն իմ խորհուրդներից:

ԵՍ ԵՄ Կութհումին

Տատյանա Միկուշինա, 2013 թ.

թարգմանեց Խ. Մանասելյանը

   

Հիսուս Քրիստոսի այսօրվա Ուղերձը

Ուսմունքի հիմունքների և

Ուսմունքի փոխանցման

անընդհատության մասին

Պաշտելի Հիսուս

27 հունիսի, 2013 թ.

ԵՍ ԵՄ Հիսուս:

Ինձ Աստծո Որդի կոչեցին Ուսմունքի այն հետևորդները, որոնք եկան իմ խաչելությունից և համբարձվելուց հետո:

Ուսմունքի շատ դրույթներ, որոնք ես իմ աշակերտներին տվեցի այդ կյանքիս ընթացքում, հետագայում շատ փոփոխություններ կրեցին՝  երբեմն փոքր-ինչ աղավաղվելով, երբեմն էլ այնպիսի արմատական փոփոխություններ կրելով, որ արդեն հնչում էին լրիվ հակառակ իմաստով: Եվ դրանում մեղավոր էին ոչ այնքան իմ աշակերտները, որքան այն տգիտությունը, որն այն ժամանակ տիրապետող էր Երկրում և, ցավոք, շարունակում է տիրապետող լինել նաև ձեր օրոք:

Պահանջվեց ամբողջ 2000 տարի, մինչև որ Երկրի այն մարդիկ, որոնք իրենց քրիստոնյա են համարում, սկսեն իրենց՝ թեկուզ չնչին ինչ-որ մասով ընկալել Վերամարմնավորումների և Կարմայի Օրենքներին վերաբերող իմ Ուսմունքները:

Եթե դուք անաչառ կերպով վերընթերցեք թեկուզ այն Ավետարանական տեքստերը, որոնք հասել են ձեզ, ապա կնկատեք, որ այսուայնտեղ սփռված են այդ հիմնարար Ուսմունքներին վերաբերող որոշակի ակնարկներ: Եվ դրանք հասկանալի կլինեն յուրաքանչյուրին, ով տեքստը կարդում է ոչ թե իր արտաքին գիտակցության պրիզմայի միջով, այլ իր ամբողջ սրտով:

Շատ բաներ, որոնք կորսվում են, կամ դրանց բավարար նշանակություն չի տրվում, կարող են հանգեցնել բուն Ուսմունքի և դրա էության ոչ ճիշտ մեկնաբանությանը:

Եվ անցողիկ ու անանց մարդու մասին խոսքն էլ է անհասկանալի դառնում, եթե դուք տեղյակ չեք Կարմայի և վերամարմնավորումների Օրենքներից: Այդ խոսքերն անհասկանալի են մնում նաև այն դեպքում, երբ մարդուն դիտում եք որպես միս ու արյուն, բայց և ձեր ուշադրության տակ եք առնում նրա հոգին և Աստծո Ոգին, որոնք առկա են ամեն մի մարդու մեջ:

Կարելի է ազդել մարդու խղճի վրա և նրան ահաբեկել Աստծո պատժով: Եվ դա կարող է իր ազդեցությունն ունենալ չզարգացած գիտակցության վրա: Բայց այն դեպքում, երբ մարդն իր պրպտուն մտքով սկսում է ճանաչել աշխարհակառույցի օրենքները, ահաբեկելն ու կարգի հրավիրելը դադարում են ազդեցություն գործել: Այդ դեպքում վատագույն արդյունքը կլինի այն, որ մարդը երես կթեքի Աստծուց և Նրա սպասավորներից. կմերժի եկեղեցին և բուն հավատը:

Այնուհանդերձ առավել զարգացած անհատներն իրենց թույլ են տալիս ավելի առաջանալ աշխարհն ու դրա կառուցվածքը ճանաչելու գործում: Եվ Ավետարանի այն խոսքը, թե՝ «ինչ որ ցանես, այն էլ կհնձես», նրանց համար ձեռք է բերում իր ճշմարիտ իմաստը:

Հիրավի, առանց հասկանալու մարդու այս և անցած կյանքերի արարքների փոխկապակցվածությունը՝ արտաքին գիտակցությանը հնարավոր չէ բացատրել, թե ինչու պետք է պահապանել բարոյականության օրենքը և հետևել որոշակի բարոյական նորմերի ու կանոնների:

Յուրաքանչյուր անհատ պետք է հասնի իր արարքների և այդ արարքների հետևանքների միջև եղած կապի գիտակցմանը: Առանց այդ կապը հասկանալու՝ հնարավոր չէ բացատրել ձեր աշխարհում առկա շատ անարդարություններ, ինչպիսիք են՝ ունեցվածքային անհավասարությունը, ոմանց կաստայական արտոնություններն ու մյուսների աղքատությունը, ոմանց հյուծող ծանր տկարություններն ու մյուսների անթերի առողջությունը:

Ինչու՞ են ոմանք վաղաժամ մահանում, իսկ մյուսներն ապրում երկար կյանքով... Այդ ամենի պատճառները կարելի է գտնել միայն անցած կյանքերում, և երբեմն դրանք բացարձակապես հնարավոր չի լինում բացատրել ընթացիկ մարմնավորման և մեկ կյանքի հանգամանքների տեսանկյունից:

Ուստի խնդիրներից մեկը, որն ուզում են լուծել Համբարձյալ Վեհապետները՝ Ուսմունքը փոխանցելն է այն տեսքով, որ այն ընկալելի լինի ներկայումս ապրող մարդկության գիտակցության համար: Ուսմունքի փոխանցման անընդհատությունն այն բանի երաշխիքն է, որ մարդկությունը մշտապես իր տրամադրության տակ փրկարար ճոպան կունենա, որի միջոցով Ուղով առաջ մղվողները կկարողանան դուրս ելնել կյանքի փոթորկուն ջրերի տակից:

Առանց Ուսմունքի փրկարար ճոպանի, առանց դրա անընդհատ նորացման և անընդհատ փոխանցման՝ մարդկությունը շատ արագ կգահավիժի դեպի անասնական գոյություն և այլևս ունակ չի լինի ջոկելու Լույսը խավարից, ճշմարտությունը՝ ստից, բարեպաշտական վարքը՝ մեղսականից:

Ցավոք սրտի, չնայած մեր կողմից անխոնջ կերպով գործադրվող ջանքերին՝ մարդկության որոշակի մասն ուշադրություն չի դարձնում  մեր խրատներին և շարունակում է ապրել այնպես, կարծես առջևում մահից բացի ոչինչ չկա:

Մարդկային այն սերունդները, որոնք իրենց գիտակցությամբ հեռանում են Աստծուց և չեն ուզում ճանաչել աշխարհակառույցի հավերժական Օրենքը, այնպիսի հետևանքներ են ծնում իրենց հետնորդների համար, որոնք տանում են դեպի լրիվ հետզարգացում և բարոյազրկություն: Բարոյական նորմերի խախտումն արդեն ընկալվում է որպես ընդունված բան:

Եթե մարդկային մի սերնդի գիտակցությունից ջնջվում է Կարմայի Օրենքին վերաբերող գիտելիքը, ապա հաջորդ սերունդներն ավելի ու ավելի են գլորվում դեպի անաստվածություն և բարոյական նորմերի խախտում, քանի որ մարդիկ դադարում են կապ զգալ իրենց գլխին թափվող դժբախտությունների և իրենց սեփական արարքների միջև, որոնք հանգեցրել են այդ դժբախտություններին:

Եկեղեցական կառույցը, որը կոչված է մարդկանց պահելու Աստվածային Օրենքի շրջանակներում, իր նշանակությունը կորցնում է այն բանին զուգընթաց, երբ մարդիկ կորցնում են հավատը և հեռանում բարոյական իդեալներից:

Այդ պայմաններում մարդկության միակ փրկությունն այն է, որ Աստծուն ու ճշմարիտ հավատին վերադառնալն ընկալեն որպես գիտակցության վիճակ: Աստծուն պատկերացնեն ոչ թե որպես եկեղեցական սրբապատկերի վրա պատկերված ծերուկ, այլ որպես ներքին Լույս, որը թափանցում է համայն Արարչության միջով, ներկա է բոլոր արարածների սրտերի խորաններում և զարգացման այս փուլում ունակ է մարդկությանն օգնութուն ցուցաբերելու:

Աստծո այն ըմբռնումը, որ Նա ոչ թե տաճարներում է ապրում, այլ իրենով լցրել է շրջակա ամբողջ տարածությունը՝ էվոլյուցիոն զարգացման այս փուլում կարող է ընկալելի լինել մարդկանց մտքերի համար: Եվ աշխարհին տիրած այս քաոսի պայմաններում կայունության միակ կարգավորիչն ու երաշխավորը ներքին ղեկավարը կլինի՝ մարդու խիղճը կամ Աստված, որը ներկա է յուրաքանչյուր մարդու ներսում:

Մենք ձեզ այցի ենք գալիս այն հույսով, որ ձեզնից շատերն ունակ են հասկանալու մարդկության զարգացման այս փուլում մեր մատուցած ճշմարտությունները: Անկեղծ հույսեր ենք փայփայում, որ այդ ճշմարտություններն աճ կտան ձեր սրտերում, և դուք միասնական կդառնաք այն Ուսմունքի հետ, որը մենք տալիս ենք:

Երբ դուք ձեր զարգացմամբ հասնում եք այդ փուլին, միասնական եք դառնում ներքին ճշմարտության կամ ձեր սրտերում ներկա Աստծո հետ. դուք ձեր աշխարհի համար դառնում եք Լույսի և գիտելիքի աղբյուր: Եվ ձեր աշխարհում որքան շատ լինեն այդպիսի լուսատուները, այնքան ավելի շատ երաշխիքներ կլինեն, որ աշխարհը կվերականգնի իր կայունությունը և կդադարի ճոճվելուց այն ամեն տեսակի սուտ ուսմունքների ու դավանաբանությունների պատճառով, որոնք մարդկային տգիտությունն ու ահերն օգտագործում են, որպեսզի բավարարություն տան առանձին անհատների շահադիտական նպատակներին:

Ես լիահույս եմ, որ մեր Դեսպանորդի միջոցով տրվող այս Ուղերձները կարդացող յուրաքանչյուր ոք կկարողանա ձեռք բերել ներքին հավատի անսպառ աղբյուր և իր կայունությամբ ու անսասան հավատով դիմակայել աշխարհի բոլոր ցածրակարգ արտաքին դրսևորումներին:

ԵՍ ԵՄ Հիսուս

Տատյանա Միկուշինա, 2013 թ.

թարգմանեց Խ. Մանասելյանը   

Սեն-Ժերմենի այսօրվա Ուղերձը

Ես ձեզ կոչ եմ անում առաջնորդվել ձեր իդեալներով՝ անկախ ամեն ինչից

Սեն-Ժերմեն

26 հունիսի, 2013 թ.

ԵՍ ԵՄ Սեն-Ժերմենը...

Տիկնայք և պարոնայք, ես կրկին ձեզ այցի եմ եկել, որպեսզի վկայեմ իմ հարգանքի հավաստիքը ձեզնից նրանց, ովքեր անխոնջ կերպով աշխատում են իրենց վրա և հնարավոր ամեն ինչ անում են, որ Նոր Դարաշրջանի էներգիաները ներթափանցեն ձեր շրջակա աշխարհը:

Ես այսօր եկել եմ, որպեսզի  դուք հիշեք այն դարաշրջանը, երբ ձեզնից շատերը գտնվում էին մարմնավորվման մեջ: Ես եկել եմ՝ որպես ձեր Ասպետ-Հրամանատարը:

Պետք է ձեզ հիշեցնեմ, որ կար ժամանակ, երբ գոյություն ունեին ասպետական միաբանություններ: Նաև պետք է հիշեցնեմ, որ այդ դարաշրջանում, ինչպես հիմա ձեր օրերում է, կային իսկական Ոգու ասպետներ, որոնք պատրաստ էին իրենց կյանքը զոհել հանուն իդեալների: Կային և այնպիսինները, որոնք նույնպես ասպետական զրահներ էին կրում և մասնակցում ասպետական մրցույթներին: Բայց նրանց սրտերը մունջ էին մնում և աշխարհին չէին փոխանցում Աստվածային ճշմարտությունն ու անեղծ իդեալները:

Ձեր օրոք էլ կան իրական Ոգու ասպետներ, որոնք պատրաստ են  կյանքի ցանկացած իրավիճակում պաշտպանելու իրենց համոզմունքները: Եվ կան նաև այնպիսինները, որոնք Ուսմունքով քողարկվելով գործում են ի շահ իրենց հետաքրքրությունների՝ փորձում են թեմ ստեղծել և այն առաջնորդել իրենց անձնական հետաքրքություններին համապատասխան:

Շատ տարածված պատկեր է ձեր հասարակությունում, այնպես չէ՞...

Շատերն են հիմա խմբեր ստեղծում և փորձում դրանք առաջնորդել: Կույրերը առաջնորդում են կույրերին:

Այսօր ես եկել եմ, որ ձեզ հավատի ազդակ փոխանցեմ և տամ այն ուղղությունը, որով կոչված եք ընթանալու:

Որպես օրինակելի նմուշ՝ վերցրեք ասպետական պատվի կանոնակարգը (կոդեքսը): Կան ճշմարիտ իդեալներ, հանուն որոնց դուք պետք է մարտնչեք և ոչինչ չզիջեք: Բայց կան նաև ճշմարիտ իդեալների կեղծ կրկնակները:

Եվ այնժամ, երբ դուք ինձ ասում եք, թե չեք կարողանում դրանք իրարից զանազանել և չեք կարողանում պարզել, թե ձեզ առաջնորդողը ճշմարիտ Հովիվ է, թե կեղծ՝ դուք կեղծավորություն եք անում: Դուք միշտ գիտե՜ք ճշմարտությունը... Ձեր սիրտը ձեր աշխարհի ամենակատարյալ զանազանման գործիքն է: Եվ այնժամ, երբ չեք լսում ձեր սրտի ձայնը, սկսում եք լսել ձեր խելքին, որը միշտ ձեզ կապացուցի, թե ինչու՛ է ավելի հարմար և անվտանգ այսինչին հետևելը:

Այժմ ձեր պատկերացումները պետք է առավել հստակեցվեն, թե որտեղ են ճշմարիտ արժեքները, և որտեղ՝ դրանց կրկնակները:

Լուսինն էլ է լույս տալիս, բայց այդ լույսը արևի լույսի անդրադարձն է ընդամենը: Նմանապես՝ կան այնպիսինները, որոնք ձեր աշխարհ են բերում Աստվածային Լույս, և կան նաև այնպիսինները, որոնք միայն անդրադարձնում են այդ Լույսը: Եվ դա ակնհայտ է ճիշտ այնպես, ինչպես արևի և լուսնի դեպքում:

Դուք մուտք եք գործում Նոր Դարաշրջան: Եվ հիմնական հատկանիշը, որը ձեզ վիճակված է ձեռք բերել և կատարելագործել Նոր Դարաշրջանում՝ զանազանման հատկանիշն է: Այն զարգացնելու համար հարկ չկա, որ հաճախեք սեմինարների և դասախոսություններ լսեք: Այդ հատկանիշը հատուկ է ձեզ ծննդյան օրվանից: Եվ բոլորդ էլ մանուկ հասակում տիրապետել եք այդ զանազանման հատկանիշին: Բայց հետո, երբ հայտնվել եք կեղծ արժեքների շրջապատում, որոնք տիրապետող են ձեր աշխարհում, դուք ենթարկվել եք այդ շրջապատին և սկսել եք հենվել ձեր մարմնական խելքի վրա, և ոչ՝ սրտի:

Ուստի հիմա ձեր խնդիրն է՝ պարզապես ճշմարիտ արժեքները վերադարձնել ձեր կյանք: Այդպիսի արժեքներից են՝ պարտքի զգացումը, արժանապատվությունը, նվիրվածությունը, հավատը և սերը: Ես կարող եմ էլի շատ ճշմարիտ արժեքներ թվարկել: Բայց ինքնե՛րդ էլ քաջատեղյակ եք դրանց: Եվ այնժամ, երբ թաքնվում եք կեղծ արժեքների հետևում և փորձում հետևել կեղծ առաջնորդների, ձեր հոգու խորքում միշտ իմանում եք, որ կեղծ ուղու վրա եք: Քանզի նման դեպքերում ձեզ շահախնդրությունն է առաջնորդում: Դուք փորձում եք ձեզ համար ինչ-որ բան ստանալ. կարևոր չէ, թե ինչ՝ լավ հարաբերություններ, հանգիստ ու կուշտ կյանք, իշխանություն կամ փող, կրքերի կամ քմայքների բավարարում: Ցանկացած դեպքում՝ այդ մի բանը հակադրության մեջ է լինում Աստվածային արժեքների և ասպետության ճշմարիտ Ոգու հետ:

Ես ինձ հաշիվ եմ տալիս, որ ձեր աշխարհում լինելով, գործնականում հնարավոր չէ ճշմարիտ Աստվածային արժեքներին հետևելը: Քանզի ձեր աշխարհն իննսուն տոկոսով բաղկացած է կեղծ արժեքներից:

Բայց հատկապես հիմա՛ եմ ես եկել գլխավորելու ձեզնից նրանց, ովքեր պատրաստ են կանգնելու Համբարձյալ Դասերի դրոշի տակ:  Հատկապես հիմա՛ եմ՝ որպես ձեր Ասպետ-Հրամանատար, ձեզ կոչ անում հավաքվելու մեր դրոշի տակ:

Թշնամուն հեշտ է հաղթելը, եթե նա թույլ է և սակավազոր:

Փա՜ռք ու պատիվ նրանց, ովքեր փոքրաթիվ ուժերով հաղթանակ են տանում: Եվ հիմա ես դիմում եմ հատկապես նրանց, ովքեր պատրաստ են զոհաբերելու իրենց րոպեական շահերն ու փայլփլուն գովազդների միջոցով դեպի հետտոնական զարդարանքների կողմը տանող պատրանքային խաղալիքները, դուրս գալու մարտադաշտ և կռվելու հանուն այն ճշմարիտ արժեքների, որոնց թվին են պատկանում ձեր նվիրվածությունը Եղբայրությանն ու Վեհապետներին և ձեր անկոտրում հավատն ու սերը...

Ես պատրաստ եմ գլխավորելու ձեզնից նրանց, տիկնայք և պարոնայք, ովքեր չեն երկյուղում իրենց իդեալների համար մարտնչելուց՝ անգամ եթե թշնամու ուժերը բազմակի գերազանցում են քանակապես:

Դրա համար հիշե՛ք խնդրեմ ձեր պատվի կոդեքսը, որի առաջին իսկ տողերը բարբառում են այն մասին, որ ձեր պատրանքային աշխարհում չկա ոչինչ, որ ավելի բարձր լինի կամ ավելի բարձր արժեք ունենա, քան Աստված և Նրա Օրենքին հետևելը:

Այս դրույթից ելնելու դեպքում՝ մնացած ամեն ինչը ձեզ պարզ կդառնա և ձեռք կբերի այլ իմաստ:

Եվ անգամ ձեր կյա՛նքն իսկ ավելի ցածր արժեք է, քան Աստված և Նրա Օրենքին հետևելը: Քանզի զոհելով ձեր կյանքը՝ դուք ձեռք եք բերում հավերժական Կյանք: Իսկ եթե տարվում եք րոպեական շահերով և պատրանքային աշխարհի հրապուրանքներով, ապա ընդմիշտ կորցնում եք ձեր հոգին:

Ես մաղթում եմ, որ կանգնեք Աստվածային ճշմարտությունը պաշտպանելու ուղու վրա: Հենց հիմա՛ է այն ժամանակը, երբ դուք պետք է ցուցադրեք ձեր վճռականությունը և ձեր համոզմունքների ամրությունը, երբ դեմ առ դեմ կանգնած եք պատրանքային ուժերի առջև, որոնք անամոթաբար քմծիծաղ են տալիս և չեն հավատում, որ դեռևս կան մարդիկ, որոնց կյանքի առաջնահերթ խնդիրը՝ իրենց իդեալներին հավատարիմ մնալն է:

Ես ձեզ կոչ եմ անում հետևելու ձեր իդեալներին՝ անկախ ամեն ինչից: Եվ հենց դա՛ է ասպետության ճշմարիտ ոգին: Եվ հենց դա՛ է անմահությունը...

Ես ձեզ կոչ եմ անում մտնել հավերժական Կյանք: Ես ձեզ կոչ եմ անում հետևելու ինձ՝ ձեր Ասպետ-Հրամանատարին:

Արժանապատվորեն մուտք գործենք Նոր Դարաշրջան՝ Ջրհոսի դարաշրջանը...

ԵՍ ԵՄ Սեն-Ժերմենը

Տատյանա Միկուշինա, 2013 թ.

թարգմանեց Խ. Մանասելյանը

ԺԱՄԱՆԱԿԻ ԲԱՆԿ

Ի հավելումն Հավատի, Հույսի՝
Հայրը բացել է ժամանակի բանկ:
Ժամանակավոր, առանց տոկոսի
Տրամադրվում է ժամանակավարկ:

Գրավ դրեք ձեր ինչքն ու փողերը,
Դղյակը, «բենթլին», անվադողերը,
Դարձեք մշտաբաց բանկի այցելու՝
Առանց «ծանոթի», առանց մրցելու:

Ձեր վարկն անպայման կվերադարձնեք,
Եթե դժոխքի դռներով անցնեք.
Բայց և կարող եք, ըստ գործող կարգի,
Համատեր լինել Հավերժի բանկի:

Իսկ ո՞րն է կարգը. խնդրեցե՛ք Հորը,
Որ երաշխավոր լինի այդ գործում,
Եվ հետագա ձեր ամեն մի օրը
Լցրեք աղոթքով՝ ի փառս Աստծու:

Ձեզ դուր չեկա՞վ սույն ընթացակարգը.
Ուրեմն լսեք, ինչ կասի Չարքը...

Մարիամ Աստվածածնի այսօրվա Ուղերձը

Թույլ տվեք Աստծուն մուտք գործել ձեր կյանք

Մայր Մարիամ

23 հունիսի, 2013 թ.

ԵՍ ԵՄ Մայր Մարիամը:

Ես եկել եմ: Ի՞նչ եք կարծում, ինչի՞ մասին կլինի մեր այսօրվա զրույցը:

Ես կարծում եմ, որ դուք կուզենայիք ինձ հետ զրուցել շատ բաների մասին: Եվ հարցնել շատ բաների մասին: Այնուհանդերձ, ես այսօր խաղաղ զրույցի համար չեմ եկել: Ես վճռականորեն եմ տրամադրված և պատրաստ եմ լուրջ զրույցի, որն այժմ կկայանա:

Ես կուզենայի ձեզ հետ զրուցել ձեր սպասավորության և ձեր պարտավորությունների մասին: Ձեզնից շատերը մարմնավորվելուց առաջ շատ պարտավորություններ են ստանձնել, որոնք կապված են աշխարհին մատուցվելիք իրենց սպասավորության հետ: Սակայն այժմ նրանք մոռացել են  իրենց այդ պարտավորությունների մասին: Եվ դա շատ ցավալի է: Հատկապես ցավալի է դա այս պահին, երբ մոլորակի իրավիճակը շարունակում է բարդանալ. խավարը փակել է մարդկանց աչքերը և թույլ չի տալիս լիաթոք շնչել, մղվել դեպի վերածննդի լուսավոր ու բերկրալից էներգիաները:

Խոսքս ամենից առաջ վերաբերում է իմ սիրելի Ռուսաստանի բնակիչներին: Բայց նաև պատրաստ եմ զրուցելու աշխարհով մեկ սփռված իմ սիրելի զավակներից շատերի հետ:

Ես բերկրանք եմ զգում այնժամ, երբ մենք միասին համատեղում ենք մեր ջանքերը և համատեղ աղոթում աշխարհի համար: Եվ տրտմությունն է ինձ պատում այնժամ, երբ աղոթողների շարքերը նոսրանում են և րոպեական զվարճությունները ձեզ կտրում են գլխավորից՝ ձեր աշխարհի ցանկացած բացասական ուժերի և դրսևորումների դեմ աղոթքային հակամարտության մեջ մտնելուց:

Մենք մեր համատեղ աղոթքով ունակ ենք փոխելու ցանկացած երկրի ցանկացած իրադրություն: Մեր համատեղ աղոթքով կարող ենք կանխել ամենածանր իրավիճակը և այն ուղղորդել դեպի թեթև ու բերկրալից Աստվածային հուն:

Ես պատրաստ եմ ձեր աղոթքի պահին լինելու ձեզ հետ: Պատրաստ եմ միանալու այն մարդկանց, ովքեր իրենց աղոթքն անկեղծորեն ուղղում են ինձ և օգնություն խնդրում:

Տերը ձեզ չտեսնված հնարավորություններ է տալիս: Տերը պատրաստ է մոտենալ ամեն մի նկրտում ունեցողի, ով անկեղծ աղոթում է: Եվ ես նույնպես Նրա հետ կլինեմ ձեզնից յուրաքանչյուրի կողքին:

Ես անհամբեր սպասում եմ, թե երբ կգա ձեր անկեղծ աղոթքի պահը, որպեսզի գամ և ուժեղացնեմ այն: Երբեմն մոտենում եմ ձեզնից նրանց, ովքեր պարտավորություն են ստանձնել ամեն օր կարդալու իմ Վարդարանները: Բայց որքա՜ն մեծ է լինում իմ զարմանքն ու հիասթափությունը, երբ աղոթելու փոխարեն դուք խորասուզված եք լինում այնպիսի գործերի մեջ, որոնք ձեզ ավելի կարևոր են թվում: Ես գալիս եմ ձեր աղոթքի ճշգրիտ ժամին, որպեսզի ձեզ հետ աղոթելով ուժեղացնեմ այն: Բայց ես ձեզ տեղում չեմ գտնում: Դա շատ ցավալի է...

Պաշտելիներս, մի՛ վշտացրեք ինձ ձեր անկայունությամբ ու ծուլությամբ: Հասկացե՛ք, այժմ միայն ձեր աղոթքները կարող են փրկել ու շտկել այն իրավիճակը, որը հաստատվել է Ռուսաստանում և աշխարհում: Միայն ձեր աղոթքներո՛վ դուք  կարող եք կասեցնել ամենաահավորը...

Ես խնդրում և աղաչու՜մ եմ ձեզ...

Չէ՞ որ առանձնապես բարդ բան չէ, սիրելինե՛րս, որ նույնիսկ այն դեպքում, երբ ժամանակ չունեք Վարդարան կարդալու, պազապես ձեր սրտի ամբողջ սիրով ձգտեք դեպի ինձ: Մեր հայացքները կհանդիպեն, և ես կհասկանամ, որ դուք հիշում եք ինձ, բայց հանգամանքները թույլ չեն տալիս, որ այդ օրն աղոթքին ժամանակ հատկացնեք: Այդ դեպքում ես կգամ հաջորդ օրը, և մենք միասին աղոթքային ջանքեր կգործադրենք հանուն Ընդհանուր Բարօրության:

Մեր համատեղ աղոթքի ուժն այժմ զորեղացված է, ինչպես երբեք: Եվ ես վստահեցնում եմ ձեզ, որ մենք միասին կարող ենք ի չիք դարձնել անցյալում ու ներկայում մարդկանց գործած ոչ ճիշտ արարքների ամենաահավոր հետևանքները, եթե բացասական էներգիաներին հակադրենք մեր հավատն ու կուռ միասնությունը:

Պատկերացրեք, թե այդ դեպքում ինչպիսի՜ հզոր աղոթքային ալիք է անցնում երկրի մի ծայրից մյուսը: Պատկերացրեք, թե աղոթողների ձայներն ինչպես են միայուսվում և վերածվում մեկ միասնական ամպրոպային ձայնի: Եվ այդ ձայնը լսելի է լինում համայն մոլորակում:

Մենք միասին կկարողանաք դիմակայել...

Ահա ասում եմ ձեզ, որ իրավիճակն այնքան ծանր է, որ նույնիսկ դժվար է դրան հավատալը: Եվ միակ բանը, որ հիմա ես ձեզնից խնդրում եմ՝ ձեր աղոթքների էներգիան ինձ առաքելն է, որպեսզի կարողանամ այն տնօրինել իմ հայեցողությամբ:

Վստահե՛ք ինձ ձեր աղոթքային ջանքերը: Ինձնից օգնություն խնդրեք, և ես իմ հրեշտակներին օգնության կուղարկեմ այն իրավիճակներում, որոնք անլուծելի են թվում:

Պատկերացրեք այնպես, որ ես իմ հրեշտակների հետ մուտք եմ գործում ձեր իշխանական մարմինների պատերից ներս: Մեր ներկայությամբ մենք փոխում ենք իրադրությունը և ուժերի գերակշռություն ստեղծում որոշումներ ընդունելու ընթացքում:

Կարող եք ինձ պատկերացնել ցանկացած բանակցությունների գործընթացում, որոնք կայանում են պետական մակարդակով. ասես բանակցությունների սեղանի մոտ ես էլ եմ նստած և վերահսկում եմ ձեր աշխարհում ընդունվող բոլոր այն որոշումները, որոնք վերաբերում են քաղաքականությանն ու տնտեսությանը, կրթությանն ու առողջապահությանը, մշակույթին և սոցիալական ապահովությանը:

Ձեր տեսլականներն ու աղոթքներն ինձ և մյուս Համբարձյալ Վեհապետներին հնարավորություն կտան մասնակցելու ցանկացած պետական մակարդակով կայացվող որոշումների ընդունմանը: Այսպիսի պարզ գործառույթով մենք կկարողանանք բեկում մտցնել ցանկացած իրավիճակում և դրա հանգուցալուծումն ուղղորդել դեպի Աստվածային հուն:

Ես գիտեմ, որ հիմա շատ մարդիկ տառապում են ճնշվածությունից, և նրանցից շատերի սրտերին տիրել են վախն ու ատելությունը:

Այդ ամենը, պաշտելինե՛րս, տեղի է ունենում ձեր կյանքերում Աստծո անբավարար ներկայության պատճառով: Աստվածային էներգիան դուք ինքներդ եք արգելափակում և զանգվածային տեղեկատվության միջոցները, որոնք ձեզ խորասուզում են գիտակցության բացասական վիճակների մեջ:

Միայն ձեր աղոթքներով ոգեկոչված Աստվածային էներգիայի հոսքերը կարող են մաքրել ձեր մարմինը, գիտակցությունն ու ենթագիտակցությունը և ձեզ ազատել վախից, ճնշվածությունից ու ատելությունից: Ձեր գիտակցության ցանկացած անորակ վիճակ կարելի է չեզոքացնել Աստվածային էներգիայով, որն ամեն օր կյանքի կկոչեք ձեր աղոթքների միջոցով:

Ձեզնից յուրաքանչյուրի աղոթքի ժամին ես ձեզ հետ կլինեմ: Ես կզորեղացնեմ ձեր աղոթքի ուժը և կօգնեմ ձեզ: Բայց ես ձեզ համար ոչինչ չեմ կարող անել, եթե դուք ինձ չեք տալիս ո՛չ ձեր աղոթքի էներգիան, ո՛չ ձեր սիրո էներգիան, որոնք կառաքեիք ինձ, եթե մտասևեռվեիք իմ պատկերի վրա:

Ուստի ոչ ոքի մ՛ի մեղադրեք, եթե գիտակցության բացասական վիճակում եք հայտնվում, և եթե փորձանքներն ու դժբախտությունները թացացնում են ձեր աչքերը: Աստված այնքան ողորմած է, որ մի կանչը կամ բոցաշունչ աղոթքը կարող են բավարար լինել, որպեսզի փոխվի ցանկացած իրավիճակ:

Ձեր բոլոր աղոթքներն ու կանչերը պետք է ի կատար ածեք միայն հանուն Աստծո:

Մենք կարող ենք փոխել ցանկացած իրադրություն. և մենք դա կանենք... Աստվածային հրաշքը հենց ձեր կողքին է գտնվում: Եվ այն պատրաստ է երևալու, սակայն հրաշքի դրսևորման համար պետք է առկա լինեն ձեր աղոթքների էներգիան և երջանկության, Բարիքին ու Բարուն հասնելու ձեր դրական ձգտումները:

Դուք ստանում եք այն, ինչին ձգտում եք: Եվ եթե ամեն օր հայհոյանքներ եք տեղում անխտիր ամեն ինչի վրա՝ հայհոյում եք ձեր կառավարությանը, ձեր շրջապատում եղած բոլորին և նույնիսկ Աստծուն, ապա հազիվ թե դրական արդյունքի հասնեք, և հազիվ թե ձեր կյանքում երբևէ երջանիկ լինեք:

Իսկ եթե անկախ ամեն ինչից ունակ եք հավատ ու սեր պահել ձեր սրտերում, եթե պատրաստ եք ինքներդ ձեզ և ձեր մերձավորներին պաշպանելու աղոթքով ու սիրով, ապա ամենավատ ու անդառնալի բաները կշրջանցեն ձեզ ու ձեր մերձավորներին: Իսկ եթե տարեցտարի ավելի ու ավելի շատանա այն մարդկանց քանակը, որոնց համար առաջին տեղում Աստված է և Նրա Օրենքը, ապա ոչ մի դժվարություն, ոչ մի արհավիրք ու ճգնաժամ չի սպառնա ձեր երկրին ու դրա մարդկանց:

Դուք տեսնում եք, որ Աստված մշտապես հոգում է ձեր մասին:

Թույլ տվեք Աստծուն մուտք գործել ձեր կյանք:

ԵՍ ԵՄ Մայր Մարիամը

Տատյանա Միկուշինա, 2013 թ.

թարգմանեց Խ. Մանասելյանը

Ես եկել եմ ձեր հոգուն օգնություն ցուցաբերելու

Գուան Ին

22 հունիսի, 2013 թ.

ԵՍ ԵՄ Գուան Ինը:

Ես այսօր ձեզ այցի եմ եկել ոչ որպես Կարմայական Վարչության անդամ, և ոչ որպես Բարեգթության Աստվածուհի: Այսօր եկել եմ որպես ձեր ավագ քույրը:

Եկել եմ, քանի որ դուք օգնության կարիք ունեք: Ձեզնից ոմանք այնպիսի տառապանքի մեջ են, որ նույնիսկ չեն հասկանում, որ իրենց հոգիներն օգնության և ապաքինման կարիք ունեն:

Դուք ձեր տառապանքի պատճառները փնտրում եք ձեզնից դուրս: Կարծում եք, թե ամեն ինչի մեղավորն արտաքին հանգամանքներն են՝ աշխատանքը, ընտանիքը, կառավարությունը:

Սակայն ես ձեզ նոր բան ասած չեմ լինի, եթե ինձ թույլ տամ ձեզ հիշեցնելու, որ այն ամենի նախադրյալները, ինչ այժմ ձեզ հետ տեղի է ունենում, դուք ստեղծել եք կա՛մ ձեր այս մարմնավորման մի փոքր ավելի վաղ շրջանում, կա՛մ ձեր նախորդ մարմնավորումների ընթացքում: Դուք ինքներդ եք ձեր տառապանքների ծնողները:

Ձեր ցանկությունները դեպի ձեզ են քաշում ոչ միայն իրենց իրականացման հնարավորությունը, այլ նաև կարմա, որն ուղեկցում է ձեր ցանկությունների իրականացմանը:

Պաշտելի Հաութամա Բուդդան ուսուցանում էր ազատագրում ցանկություններից՝ տառապանքների պատճառից: Ձեզնից շատերն են կարդացել Հաութամա Բուդդայի Ուսմունքը: Դրանով դուք բավարարել եք ձեր գիտելիքներ ձեռք բերելու պահանջմունքը, որոնցով ուզում էիք ընդմիշտ ազատվել այդ աշխարհի տառապանքներից, այնպես չէ՞...

Սակայն հիմա ես պատրաստ եմ ձեզ այնպիսի գիտելիք տալ, որն օգտակար կլինի ձեզ համար: Այն վերաբերում է ձեր շրջակա իրականությանը:

Ձեզ թվում է, թե աշխարհը մռայլ է և անբարեհաճ: Ձեզ այնպես է թվում, թե շուրջբոլոր ամեն ինչ տառապանքի մեջ է և բուժման կարիք ունի: Բայց հենց դուք՝ ձեր հոգին է տառապում առաջին հերթին: Եվ ձեր հոգին է, որ կարիք ունի բուժման և օգնության:

Ահա և ես եկել եմ ձեր հոգուն օգնություն ցուցաբերելու:

Շատ ու շատ մարմնավորումներ առաջ, ես ճիշտ այսպես հնարավորություն ունեի ձեզ օգնելու: Պատահական մի՛ համարեք այն, որ դուք գտել եք այս թելադրությունները և հետաքրքրություն ցուցաբերել դրանց նկատմամբ: Նախկինում դուք արդեն լսել եք իմ սփոփանքի խոսքերը և հնարավորություն եք ունեցել լինելու առանձնության և աղոթքի անդորրության մեջ:

Այժմ ձեր խնդիրը բարդացել է, քանի որ հիմա ձեր մեջ ուժ պիտի գտնեք  ձեր աշխարհում տեղի ունեցող խելագարություններին հակադրելու ձեր սեփական աշխարհի անդորրն ու խաղաղությունը, որոնք պետք է բացահայտեք ձեր էության ներսում:

Ես եկել եմ ձեզ հիշեցնելու, թե ովքեր եք դուք իրականում: Նաև հիշեցնելու, որ այս մարմնավորումից առաջ դուք պարտավորություն եք ստանձնել, որ արտաքին աշխարհին կհակադրեք ձեր ներաշխարհի հանդարտությունը: Ձեր էության ներսի՛ց կբխեն ֆիզիկական աշխարհի բոլոր փոոխությունները: Եվ հենց դուք եք այն մարդիկ, ովքեր կոչված են իրենց ներսի Աստվածային աշխարհը տարածելու արտաքին աշխարհի վրա:

Այո, իհարկե, ցանկություններից հրաժարվելը շատ կարևոր է: Շատ կարևոր է նաև վարվեցողության բարոյական  հիմքերը պահպանելը: Շատ կարևոր է սեփական մտքերը, զգացմունքները և մարմինը մաքուր պահելը: Շատ կարևոր է ցանկացած իրավիճակում արտաքին կողմնորոշիչները և հանգստություն պահպանելը: Այդ ամենը կարևոր է և անհրաժեշտ:

Սակայն կա ևս մեկ ասպեկտ, որը վրիպում է ձեր արտաքին գիտակցությունից: Այդ ասպեկտը վերաբերում է ձեր ներսի Աստծո հետ ձեր փոխհարաբերություննին: Շատ կարևոր ասպեկտ է դա: Քանզի տառացիորեն ամեն ինչ կախված այն բանից, թե որքանով կկարողանաք ձեր արտաքին գիտակցությունը միացնել Աստվածային գիտակցության՝ ձեր Բարձրագույն Ես-ի հետ:

Ձեզ անհրաժեշտ է շատ մանրազնին վերաբերմունք դրսևորել  ձեր կյանքի ամեն մի արտաքին հանգամանքի նկատմամբ: Այն ամենը, ինչ կարող է խաթարել ձեր ներքին Ուսուցչի՝ ներքին Գուրուի հետ ունեցած ձեր անձնական հարաբերությունները, պետք է հեռացվի ձեր կյանքից:

Մենք բազմաթիվ անգամ եկել և տվել ենք այս Ուսմունքը: Եվ հիմա ես եկել եմ ասելու, որ հասել է ձեր կյանքի այն պահը, երբ մեր տված Ուսմունքին հետևելու ձեր չափաբաժնից է կախված տառացիորեն ձեր կյանքի ամեն ինչը: Թե որքանով կհետևեք մեր խորհուրդներին ու հանձնարարականներին, կախված է բուն ձեր կյանքը՝ ձեր հոգու էվոլյուցիայի շարունակություն ունենալը:

Դուք ձեր կյանքն ու ձեր հոգին կկարողանաք պահպանել միայն այն դեպքում, եթե ամբողջ ձեր էությամբ մղվեք դեպի Աստված և Նրա Օրենքի պահպանումը:

Դուք այլևս չեք կարողանա հետաձգել ձեր ընտրություն կատարելու պահը, որպեսզի կրկին վազեք հաճույքների ու զվարճությունների հետևից: Քանզի հասել է տիեզերական ժամը, և հունձքն ընթանում է ամբողջ թափով:

Ձեր ընտրությունը կատարողը դուք եք լինելու: Ոչ ոք ձեր փոխարեն դա չի անի: Եկել է վերջնական քննության ժամանակը: Դուք ձեր էության ներսում ընտրություն եք կատարում, և ձեզ համար այդ ընտրությունը նշանակում է կա՛մ ձեր հոգու էվոլյուցիայի շարունակություն, կա՛մ դրա ավարտ: Տիեզերական բոլորաշրջաններն անբեկանելի են: Օրենքը պահանջում է, որ ընտրություն կատարեք:

Պետք է ասեմ, որ Մեծ Կենտրոնական Արևը ձեզ այլևս նոր հնարավորություն չի ընձեռի: Ժամկետներն ավարտվում են և այլևս հետաձգվել չեն կարող:

Իսկ դա նշանակում է, որ ձեզնից նրանք, ովքեր չեն կարողացել հաղթահարել իրենց գիտակցության պատրանքային դրսևորումը, հաջորդ էվոլյուցիոն աստիճանին չեն կարողանա անցնել: Ձեր ավագ եղբայրներն ու քույրերը՝ Համբարձյալ Տիրակալներն ու Տիրուհիները, որոնք արդեն անցել են էվոլյուցիայի հաջորդ աստիճանին, օգտագործում են ամեն մի հնարավորություն, որպեսզի ձեզ օգնեն և օժանդակեն: Եղբայրության մենաստաններում աշխատանքն ընթանում է շուրջօրյա և առավելագույն ծանրաբեռնվածությամբ: Մենք գալիս ենք տառացիորեն ձեր ամեն մի կանչով և արձագանքում ձեր կոչերին ու աղոթքներին: Իսկ ձեզնից շատ քիչ բան է պահանջվում՝ կանչ հղել և աղոթել, նպատակամղվել և հավատալ:

Եկել է չտեսնված հնարավորությունների ժամանակը, երբ մի մարմնավորմամբ կարելի է ազատվել պատրանքի գերությունից: Սա հրեշավոր հակասությունների և հակադրությունների ժամանակաշրջան է, երբ միևնույն վայրում կարող եք հանդիպել և՛ անդրսահմանային սրբության նմուշների, և՛ նրանց հակադիր ուժերի վիթխարի դրսևորմանը՝ Աստվածային էներգիայի զանազան պղծումների ու աղավաղումների տեսքով:

Օրերի ընթացքում մշտապես դուք հայտնվում եք հակադիր նշանի ուժերի ազդեցության դաշտում: Եվ բոլոր օրերի ընթացքում գտնվում եք ընտրություն կատարողի վիճակում: Ցավոք, շատ քիչ մարդիկ են գիտակցում այն, ինչ տեղի է ունենում:

Մարդկանց մեծ մասը, չհասկանալով, թե ինչ է տեղի ունենում, ընկնում են հենց այն ուժերի ազդեցության տակ, որոնք վերջին հաշվով կործանում են նրանց հոգին:

Մեր խնդիրը՝ Համբարձյալ Դասերիս խնդիրն այն է, որ նախկինի պես բացատրենք իրավիճակը, տանք Երկրում ընթացող պրոցեսների բացատրությունը: Մենք կցանկանայինք հնարավորինս շատ հոգիների դուրս հանել պատրանքի ծովից: Ուստի գալիս ենք և անխոնջ կերպով կրկնում ու կրկնում ենք ձեզ համար այն խոսքերը, որոնք կարող են արթնացնել ձեր Աստվածայնությունը: Քանզի եթե արթնանաք, ապա ձեռք կբերեք ձեզ անհրաժեշտ գիտակցումն ու պայծառացումը: Իսկ երբ գիտակցեք ներկայումս տեղի ունեցող գործընթացների իմաստը, այլևս դեսուդեն չեք ընկնի և կասկածներ չեք ունենա: Դուք ձեռք կբերեք այն ներքին հիմնաձողը, որը թույլ կտա ձեզ ոչ միայն դիմագրավելու ձեզ շրջապատած պատրանքին, այլ նաև օգնելու թույլերին ու անզորներին, որոնք չեն գիտակցում, թե ինչ է տեղի ունենում և ձեր խնամքի ու հոգածության կարիքն ունեն:

Ես այսօր այցելեցի ձեզ, որպեսզի ազդակ հաղորդեմ ձեր սրտերին: Եկա, որպեսզի դրդեմ ձեր հայացքներն առօրյա ունայնից վեր բարձրացնելու և ուղղելու դեպի Աստվածային գիտակցության լեռնագագաթները:

ԵՍ ԵՄ Գուան Ինը՝ ձեր հոգիների նկատմամբ մեծ հոգածությամբ:

Տատյանա Միկուշինա, 2013 թ.

թարգմանեց Խ. Մանասելյանը

Հաութամա Բուդդայի այսօրվա Ուղերձը

Փոխեցեք ինքներդ ձեզ, նպատակամղվեք, և դուք ձեռք կբերեք Բուդդայի ոսկյա հանդերձանքն ու Աստվածային Իմաստության գանձերը

Հաութամա Բուդդա

21 հունիսի, 2013 թ.

ԵՍ ԵՄ Հաութամա Բուդդան: Ես կրկին եկել եմ:

Ես եկել եմ հեռավոր աշխարհներից և կուզենայի ձեզ փոխանցել իմ ներկայության մի մասնիկը:

Մի պահ պատկերացրեք, թե մենք միասին հենց նոր ենք վերադարձել Մեծ Կենտրոնական Արևից: Հոգևոր աշխարհում հեռավորությունը նշանակություն չունի: Դուք վիթխարի տեղաշարժեր եք կատարում տարածության ու ժամանակի մեջ: Եվ դրա համար ձեր սարքավորումների՝ մեքենաների, ինքնաթիռների կարիքը դուք չունեք...

Հեռավոր աշխարհներում տեղաշարժվելու ամբողջ մեխանիզմը թաքցված է ձեր սեփական էության ներսում: Եվ ձեզնից նրանք, ովքեր ջանասեր են ու նպատակասլաց, կարող են լքել իրենց ֆիզիկական մարմինը և ինձ հետ միասին ճամփորդել համայն Տիեզերքում: Դրա համար ձեզ անհրաժեշտ է ունենալ հոգևոր նվաճումների որոշակի մակարդակ: Իսկ այդ մակարդակը բոլորիդ համար հասանելի է:

Ես կբացեմ գաղտնիքը, թե ինչպես կարելի է այդ մակարդակին հասնել մեկ մարմնավորման ընթացքում: Եվ դա այն Ուղին կլինի, որը ես ուսուցանել եմ որպես Հաութամա Բուդդա իմ մարմնավորման ժամանակ:

Նախ և առաջ դուք պետք է ընտրեք ձեր շարժման ուղղությունը: Քանի դեռ չեք որոշակիացրել, թե ինչ ուղղությամբ պետք է ընթանաք, ոչնչի չեք կարողանա հասնել: Ձեր էությունը պետք է առագաստանավի պես համընթաց լինի Տիեզերական Օրենքի քամուն: Դուք պետք է վերջնական և անբեկանելի որոշում կայացնեք և համոզված լինեք ձեր որոշման մեջ, որ ձեզ համար գլխավորն այս Տիեզերքի Բարձրագույն Օրենքն է, որին այլ կերպ կարելի է Աստված անվանել: Եվ եթե ինքներդ ձեզ չկեղծեք, եթե իրոք անկեղծորեն ձեր կյանքում գլխավորը համարեք այս Տիեզերքի Բարձրագույն Օրենքը, ապա ձեր հաջորդ քայլն ու բոլոր հետագա քայլերը դուք կանեք ճիշտ ուղղությամբ:

Դուք պետք է որոշեք, թե ձեր կյանքում ով է գլխավորը՝ ինքնե՞րդ, թե՞ Աստված: Քանի դեռ խնդրում եք Աստծուն, որ նա բավարարություն տա ձեր ցանկություններին կամ ձեզ համար անի այս կամ այն բանը, դուք հոգևոր Ուղով առաջ չեք ընթանա:

Դուք ձեր էության ներսում պետք է որոշում կայացնեք և ձեր ամբողջ կյանքն առանց մնացորդի ենթարկեցնեք Աստծուն և Նրա կարիքների ու պահանջմունքների բավարարմանը:

Ինչպես էլ որ ջանաք բավարարել այս պայմանը, դուք չեք կարողանա անմիջապես, միանգամից հասնել դրան: Երկիր մոլորակի միլիոնավոր տարիներ տևած էվոլյուցիայի ընթացքում անթափանց վարագույր է գոյացել ձեր թանձր ֆիզիկական աշխարհի և Աստվածային աշխարհի միջև: Այդ պատճառով որոշակի ժամանակ և ջանքեր են պահանջվում, որպեսզի հաղթահարվի ձեր գիտակցության մեջ արարված պատրանքը: Որոշակի ժամանակ է պահանջվում, որպեսզի հնարավոր լինի դուրս գալ ֆիզիկական աշխարհի սահմաններից և մղվել դեպի Հեռավոր աշխարհները:

Բայց եթե դուք ընդամենը մեկ փոքրիկ քայլ անեք ճիշտ ուղղությամբ և որոշակի ժամանակահատվածի ընթացքում պահպանեք ձեր նպատակամղվածությունն ու Տիեզերական Օրենքին ձեր նվիրվածությունը (որպես կանոն, դրա համար պահանջվում է ոչ թե մեկ, այլ ամենաքիչը յոթ երկրային մարմնավորում), ապա դուք Բարձրագույն աշխարհներին կհասնեք նույնքան անխուսափելիորեն, ինչպես հասնում եք Ջոմոլունգմայի գագաթին, եթե մշտապես շարժվում եք  դրա ուղղությամբ և այդ նպատակով գործադրում ձեր բոլոր ջանքերը:

Ձեր աշխարհը հենց այն բանի համար է նախատեսված, որպեսզի դուք կարողանաք հաղթահարել պատրանքի դիմադրությունը և դրանով իսկ ձեռք բերեք այն վաստակը, որն անհրաժեշտ է Բարձրագույն աշխարհում լինելու համար:

Ուստիև մենք մերթ ընդ մերթ գալիս և ուսուցանում ենք ձեզ հենց այն նպատակով, որ դուք պահպանեք ճիշտ կողմնորոշիչներ և չմոռանաք Աստվածային աշխարհի մասին:

Կարևոր չէ, թե քանի անգամ կշեղվեք Ուղուց. կարևոր չէ, թե քանի անգամ ցած կընկնեք: Գլխավորն այն է, որ դուք միշտ վերադառնաք մեզ մոտ, տեղից վեր կենաք և շարունակեք առաջ ընթանալ:

Երբեմն մեկը ֆիզիկական աշխարհում դեգերում է շատ ու շատ մարմնավորումների ընթացքում: Նա գտնում է մեր Ուսմունքը, բայց հետո պատրանքը տիրում է նրան, և նա ուրիշ ուսմունքներ է գտնում, որոնք նրան թվում են նույնքան ճշմարիտ և անեղծ, որքան մերն է: Եվ երբեմն տասնյակ մարմնավորումներ են պահանջվում, որպեսզի մարդը հասնի զանազանման այն աստիճանին, որը թույլ է տալիս անսխալ որոշելու, թե ինչն է ճշմարիտ և ինչը՝ կեղծ:

Իսկ ձեզնից նրանց համար, ովքեր դեռ հեռու են իրենց ներսում զանազանման բավարար աստիճան ունենալուց, մենք ուղարկում ենք մեր բանբերներին, որոնք ունակ են պահպանելու շարժման ուղղությունը և ճիշտ Ուղի ցույց տալու մոլորյալ հոգիներին:  Եվ ըստ մեր բանբերների նկատմամբ ունեցած ձեր վերաբերմունքի՝ մենք դատում ենք ձեր հոգու պատրաստվածության աստիճանի մասին: Երբեմն տասնյակ մարմնավորումներ են պահանջվում, որպեսզի հանգամանքները դասավորվեն այնպես, որ դուք մոտենաք մեր դեսպանորդին: Ձեր կենսահոսքի համար դա մեծ ողորմածություն է և վիթխարի հնարավորություն: Սակայն երևի կզարմանաք, եթե ասեմ, որ այդ Աստվածային հնարավորությունից օգտվում է Ուղով ընթացողների մեկ տոկոսից ոչ ավելին: Մնացածները հեռու են քաշվում այդ Աստվածային հնարավորությունից և գերադասում  գործել ըստ սեփական հունարի ու ռիսկի:

Նման վարվելակերպը ձեզ խելամի՞տ չի թվում: Բայց, ավա՜ղ, այն շատ տարածված է ձեր աշխարհում: Իսկ գիտե՞ք, թե ինչու է այդպես լինում: Ասե՛մ ձեզ.  այն պարզ պատճառով, որ մարդիկ գործում են իրենց մարմնական խելքի դիրքերից ելնելով: Բարձրագույն ԵՍ-ի ձայնն այդ դեպքում փոխարինվում է մարմնական խելքի ձայնով, և մարդիկ գերադասում են գործել ինքնուրույն և ընթանալ իրենց սեփական ուղով:

Այնուհանդերձ, եթե մեր դեսպանորդի շնորհիվ գոնե մեկ մարդ դուրս է գալիս պատրանքի խավարից, ապա մենք համարում ենք, որ այդ առաքելությունը հաջող է անցել:

Հենց այդ պատճառով է, որ մենք մեկը մյուսի հետևից Լույսի առաքելություն ենք իրականացնում ձեր աշխարհում: Եվ դա է պատճառը, որ ֆիզիկական օկտավայում մենք Լույսի կիզակետը միշտ պահպանում ենք մեր դեսպանորդների ներսում: Կարեկցանքը բոլոր Բուդդաների և Բոդհիսատվաների գլխավոր առանձնահատկությունն է: Եվ հատկապես կարեկցանքի և Երկրի մարդկության նկատմամբ սիրո շնորհիվ ենք մենք ֆիզիկակական օկտավայում մշտապես պահպանում Լույսի կիզակետը:

Այս Ուսմունքը ձեզ տրվել է բազմաթիվ անգամ: Եվ այսօր ես այն նորից եմ կրկնում:

Եթե դուք ձեր բանականությունը մշտապես ուղղված պահեք դեպի մեր աշխարհը, և ձեր շարժառիթներն էլ բացարձակ մաքուր լինեն, ապա ֆիզիկական աշխարհում միշտ կնկատեք մեր դեսպանորդներին և կհետևեք նրանց:

Իսկ եթե նախկինի պես առաջնորդվում եք անձնական բնույթի շարժառիթներով, ապա մեր դեսպանորդին չեք նկատի, եթե նույնիսկ քիթ-քթի բախվեք նրա հետ:

Թրթիռների համապատասխանության օրենքն անխափան է գործում: Ուստի նախքան Աստծուն և Վեհապետներին մեղադրելը, թե իբր նրանք զրկում են ձեզ օգնությունից և բարեհաճ չեն ձեր նկատմամբ՝ փորձեք ձեր ներսում փնտրել այն բանի պատճառը, թե ինչու եք հայտնվել այս կամ այն իրավիճակում:

Ամեն ինչ աշխարհում ներսից դեպի դուրս է գնում: Օրե՛նքն է այդպիսին: Եվ պատրանքն էլ իր հերթին դեպի ձեզ է շրջվում իր այն կողմով, որը դուք ակնկալում եք տեսնել:

Նույն ճամփով գնացող երկու մարդիկ տեսնում և ուշադրություն են դարձնում իրարից տարբեր բաների: Եվ եթե դուք հասել եք Բուդդայի աստիճանին, ապա ձեր կյանքը կանցնի այնպես, որ ոչ մի կեղտ չկպչի ձեր ոսկյա հանդերձին:

Իսկ եթե ծանրաբեռնված եք բազմաթիվ թերություններով, ապա Երկրի վրա որքան էլ իդեալական վայրում հայտնվեք՝ ձեր շուրջը միայն թերություններ և կեղտ կտեսնեք:

Ես այս օրով ձեզ այցի եկա, որպեսզի ձեր ուշադրությունը հրավիրեմ ֆիզիկական աշխարհում ձեզ հետ տեղի ունեցող ամեն ինչի ներքին պատճառների վրա: Փոխեցե՛ք ինքներդ ձեզ, նպատակամղվեք, և դուք ձեռք կբերեք Բուդդայի ոսկյա հանդերձանքը և Աստվածային Իմաստության գանձերը:

ԵՍ ԵՄ Հաութամա Բուդդան

Տատյանա Միկուշինա, 2013թ.

թարգմանեց Խ. Մանասելյանը