ՏԵՐ ՄԱՅՏՐԵՅԱՅԻ ՆՈՐ ՈՒՂԵՐՁԸ

Ձեռնադրումների Ուղին միշտ բաց է այն հոգիների համար,

որոնք հավատարիմ են Աստծուն և Վեհապետներին

Տեր Մայտրեյա

19 դեկտեմբերի, 2018 թ.

ԵՍ ԵՄ Մայտրեյան՝ Երկնքի մեծ Ողորմածությամբ կրկին ձեզ այցի եկածս: Մեր հաղորդակցության քաղցր րոպեներն ապրելն այնքա՜ն հազվադեպ է... Եվ ահա այս անգամ Ես եկել եմ բացառապես տիեզերական Բարեգթության ու Կարեկցության շնորհիվ: Զի Համբարձյալ Դասերը գիտեն, թե որքա՜ն ծանր է մարմնավորված լուսավոր հոգիների վիճակը, երբ խավարն ավելի ու ավելի է խտանում:

Ես հիշում եմ մեր Դեսպանորդի միջոցով կայացած մեր առաջին հանդիպումները: Հիշու՞մ եք, թե ինչպես ձեզ հրավիրեցի իմ Ձեռնադրումների Դպրոցը: Օ՜, դա անմոռանալի էր... Չհամբարձված սաներին հատկացված դասարանը լեփ-լեցուն էր դիմորդների հոծ խմբով:

Սակայն տարեցտարի դասարանում տեղերը դատարկվում ու դատարկվում էին, մինչև որ վերջին աշակերտները լքեցին նուրբ ոլորտի Իմ մենաստանում գտնվող Դպրոցը:

Մեկը պարզապես մոռացավ, որ գրանցվել է Ձեռնադրումների Իմ Դպրոցում, մյուսը գտավ մի այլ, ավելի հեշտ ուղի, մի ուրիշն էլ գործեց ամենաահավոր մեղքը՝ դավաճանություն:

Իմ Դպրոցի դռներն առաջվա պես լայնորեն բաց են: Սակայն այլևս չկան Ինձ մոտ ուսանելու ցանկություն ունեցողներ:

Նրանք, ովքեր լքեցին Իմ Դպրոցը, իրենց այս մարմնավորման ընթացքում այլևս չեն կարողանա հետ վերադառնալ: Նախկին աշակերտների մեծամասնությանը հարկ կլինի ևս 7 մարմնավորում անցնել, որ կրկին հնարավորություն ստանան ուսանելու Ձեռնադրումների Դպրոցում:

Իսկ նրանք, որ դավաճանության ծանր մեղքը գործեցին, ամենայն հավանականությամբ այլևս երբեք չեն կարողանա ուսում ստանալ Իմ անձնական ղեկավարությամբ:

Վիթխարի աստվածային հնարավորությունը ձեռքից բաց է թողնված: Սակայն այսօր Ես չեմ եկել, որ ձեզ ամոթանք տամ և վհատության գիրկը նետեմ: Իմ խնդիրն է՝ ձեզ բացատրել, թե ինչ հետևանքներ են ունենում ձեր կատարած ընտրությունները: Մարդկությունը շատ կարճ հիշողություն ունի, ուստի շատ քչերն են ունակ նկատելու այն կապը, որ գոյություն ունի սեփական նախընտրանքների և դրանց հետևանքների միջև:

Քաղաքակրթության հետագա ընթացքը որոշող ընտրությունները կատարում են, որպես կանոն, մարդկության առաջադեմ մասի ներկայացուցիչները՝ մարմնավորվածներից լավագույնները: Ներկայումս այդ ընտրություններն արդեն կատարված են, և դուք անխուսափելիորեն կբախվեք դրանց հետևանքների հետ:

Տառապանքները մաքրում են հոգին և բացում նոր հնարավորություն:

Ապաշխարանքն ու զղջումը կիսով չափ թեթևացնում են կարմայական բեռն ու տառապանքները:

Համբարձյալ Դասերը մշտապես ձեր կողքին են: Ոչ մի պարագայում մենք չենք լքում ձեզ: Սակայն հենց ինքներդ եք ձեզ հեռացնում Աստծուց և Համբարձյալ Դասերից: Այդ կտրվածությունը ձեզ զրկում է աստվածային գիտակցության վիճակներից՝ Բերկրանքից, Սիրուց, Անդորրից ու Ներդաշնակությունից:

Մենք ոչ մի տեղ չենք հեռացել:

Մենք մշտապես ձեզ հետ ենք:

Սակայն հիմա ձեզնից ավելի շատ ջանքեր կպահանջվեն, որպեսզի լսեք Մեզ և հասկանաք Մեր Ուսմունքը:

Եթե ձեր աշխարհից համանման օրինակ բերելու լինենք, ապա անցած 14 տարիների ընթացքում Մեր Դեսպանորդի միջոցով Մեր Ուսմունքը տալով՝ ձեզ ներկայացրինք դրա «պրեզենտացիան», ինչպես դա ընդունված է ձեր ցուցահանդեսներում ու խանութներում:

Մենք ընդհուպ մոտեցանք ձեզ և ներկայացրինք Մեր Ուսմունքը: Ես ինքս այս Դեսպանորդի միջոցով երեք միջոցառում անցկացրի, որոնց ընթացքում ոչ միայն դրսևորեցի Իմ ներկայությունը, այլև տվեցի Իմ Օրհնությունը: Ալմաստի միջոցով Ես ազդակ հաղորդեցի ձեր ներքին էությանը, որն ունակ էր արթնացնելու ձեր Աստվածայնությունը, ձեզ մղելու դեպի Ներքին Ուղին և դրանով ընթանալու:

Հարյուրավոր մարդիկ ստացան Իմ այդ ազդակն ու Իմ պատգամը:

Սակայն ստացված աստվածային Էներգիան, ավա՜ղ, ծախսվեց ո՛չ աստվածային գործերի համար...

Մեր Դեսպանորդի միջոցով Մենք ընդհուպ մերձեցանք չհամբարձված մարդկությանը: Բավականաչափ ամբողջական ձևով ներկայացրեցինք Մեր Ուսմունքը: Եվ հիմա, երբ բոլոր ընտրություններն արդեն կատարված են, Մեր Ուսմունքը պարունակող գրքերը Մենք կդնենք ամենաբարձր դարակի վրա՝ երբևէ մարդկությանը տրված ամենաբարձր ուսմունքների կողքին:

Հիմա արդեն ինքներդ պետք է ուղիներ փնտրեք Ուսմունքը ձեզ մատչելի դարձնելու համար:

Մարդկությունը չի գնահատում այն, ինչ տրվում է ազատ ու ձրի:

Դե ինչ, խիզախեք և գիտելիքներ ձեռք բերեք սեփական ջանքերի գնով:

Մոտ 12 տարի առաջ այս Դեսպանորդի միջոցով Ես դիմեցի ռուսաստանաբնակներին և խնդրեցի հոգալ Մեր Դեսպանորդի համար:

12 տարի անցնելուց հետո ի՞նչ արդյունք ունենք...

Տունը, որտեղից տրվում էին Մեր Ուղերձները, և որը Մեր Դեսպանորդն ինքն էր կառուցել, հրդեհի ճարակ դարձավ:

Աշրամը, որը Մենք 5 տարիների ընթացքում ողողել էինք Լույսով, պղծվեց ու կործանվեց:

Ռուսաստանի հողում տեղակայված մեր առաջնադետքը վերացվեց:

Տխու՜ր արդյունք է...

Եվ շա՜տ ափսոս, որ մարդկության լավագույն ներկայացուցիչներն իրենց նախապատվությունը տվեցին ո՛չ այն ուղուն, որը մարդկությանն ուսուցանում ենք Մենք՝ Համբարձյալ Դասերս:

Սակայն Ես ձեզ պետք է հիշեցնեմ, որ Ձեռնադրումների Ուղին անհատական բնույթ ունի: Դա այն Ուղին է, որը ձեր հոգիներին հնարավորություն է ընձեռում մեկ մարմնավորման ընթացքում հասնել էվոլյուցիոն զարգացման հաջորդ մակարդակին: Եվ այդ Ուղին հիմա էլ է բաց՝ անկախ ամեն ինչից: Քանի որ արտաքին հանգամանքներն ավելի ու ավելի են խստանում, ապա Ուղու վրա ունեցած ձեր ձեռքբերումները ևս, անկախ արտաքին հանգամանքներից, բազմակիորեն աճում են:

Եթե նույնիսկ համայն մարդկությունը վստահաբար ընթանա դեպի անդունդ, ապա ձեր խնդիրն է՝ ապավինել ձեր ներսի Աստծուն և դժվարին իրավիճակներում վարվել ձեր Խղճի թելադրանքով:

Այլընտրանքը մեկն է՝ կա՛մ ընտրում եք ձեր հոգու անմահությունը, կա՛մ ձեր մարմնի համար ապահովում եք կուշտ ու հարմարավետ կյանք:

Տեղի է ունենում այն, ինչին հավատում եք:

Եթե հավատում եք Աստծուն և Համբարձյալ Վեհապետներին, ապա վաղ թե ուշ կլինեք Մեզ հետ:

Եթե ընտրում եք խաբկանքներով ու հրապուրանքներով լի արտաքին պատրանքային աշխարհը, ապա կմնաք այդ աշխարհում, որը կավարտի իր գոյությունը:

Մեր Ուսմունքի էությունը շատ պարզ է: Սակայն այդ էությունը հասկանալու համար պետք է ունենալ որոշակի էներգետիկական մակարդակ:

Սխալ նախընտրանքների պատճառով դուք ստեղծում եք կարմա կամ էներգետիկական պատնեշ, որը ձեզ հեռացնում է Մեր աշխարհից:

Այս փուլի ձեր խնդիրն է՝ վերադառնալ գիտակցության աստվածային վիճակներին:

Ձեռնադրումների Ուղին բաց է բոլոր այն հոգիների համար, որոնք հավատարիմ են Աստծուն և Վեհապետներին:

Իմ այս Ուղերձին հատկացված աստվածային Ողորմածությունն սպառված է, և Ես ձեզ հրաժեշտ եմ տալիս:

Միայն մարդկության նկատմամբ իմ Սերը թույլ տվեց, որ դրսևորվի այս Ուղերձի փոխանցման հրաշքը:

ԵՍ ԵՄ Մայտրեյան

Տատյանա Միկուշինա, 2018 թ.

թարգմանեց Խ. Մանասելյանը