ԹԵԲԵԻՑ ՎԵՐ

(իննագիր[1] երգ)

 

Թե դու, թե մենք թևեր չունենք, Թեհմինե,

Թե չէ, թե չէ կթևեինք ուր ասես,

Կհասնեինք Թեբե, Թեհրան, Կահիրե,

Կնվաճեինք և՛ Էվերեստ, և՛ Մասիս:

 

Բայց եթե դու, բայց եթե մենք կամենանք,

Եթերահյուս եթերաթիռ կունենանք.

Էլ ի՞նչ Թեբե, էլ ի՞նչ Թեհրան, Կահիրե,

Կթևեինք շուրջերկրյա, Թեհմինե:

 

Աստվածածին Մայր Մարիամին թե դիմենք

Եվ աղոթենք թախանձագին մեզ օրհնել,

Ապա հոգու թեթև թևով կճախրենք

Թեբեից վեր, եթերից վեր, Թեհմինե...

 

16.11.2022թ.

---

[1] Երգն իննագիր եմ կոչել զուտ այն պատճառով, որ «թ» տառը հայերեն այբուբենի 9-րդ տառն է, և երգի յուրաքանչյուր տուն պարունակում է ուղիղ 9 հատ «թ» տառ: Գյուրջիևյան էնեագրամի հետ որևէ կապ այստեղ չկա (հեղինակ):

ՍԻՐՈ ԳՈՅԱԲԱՆՈՒԹՅՈՒՆԸ

 

Անմարմին ու անգո

Սերը հիմքն է գոյի.

Սերը կա՞, թե՞ չկա...

 

Սերը նոր ծնունդ է

Եվ սնունդն է մանկան.

Սերը կա՞, թե՞ չկա...

 

Սերը միացում է

Եվ օղակ միացման.

Սերը կա՞, թե՞ չկա...

 

Սերը սերմնացան է

Եվ սերմն է գոգնոցի.

Սերը կա՞, թե՞ չկա...

 

Սերը սերմ ցանելն է

Եվ սնունդը սերմի.

Սերը կա՞, թե՞ չկա...

 

Սերը ամենայնն է

Եվ ինչքն ամենայնի.

Սերը կա՞, թե՞ չկա...

 

Սերը մերթ կասկած է,

Մերթ դրա փարատումը.

Սերը կա՞, թե՞ չկա...

Սերը հենց աստված է

Եվ սիրելն է աստծո.

Սերը կա, չկան՝ ոչ:

 

14.11.2022թ.

ՄԵՂՈՒՆ ՈՒ ԾԱՂԻԿԸ

 

Աղջկա հմայքը

Տղայի համար է,

Տղայի զմայլանքը

Աղջկա համար է։

Աղջկա պահվածքը

Տղայի համար է,

Տղայի հարգանքը

Աղջկա համար է։

 

Տարբերվում են այդպես

Տղան ու աղջիկը,

Անտարբեր չեն, ինչպես

Մեղուն ու ծաղիկը։

 

Այո՛, նույնն է սերը,

Սիրուց չկա՛ շեղում․

Կթոշնե՜ն ծաղիկները,

Չի՜ պզպզա մեղուն։

 

Խաչիկ-Ապեր

13․11․2022թ․

ԵՐԿՈՒ ԱՆԳԱՄ ԵՐԿՈՒ

 

Երկու անգամ երկու

 

Երկու անգամ երկու

Ստացող աշակերտը

Իր երրորդ ու չորրորդ

Երկուսն էլ կստանա:

(Դե, չքվի՛ր, սատանա...)

Ռուսն այնքան է հային

Խաբել թե եղբայր է,

Որ նրան թշնամի

Համարել դժվա՜ր է...

 

(Երկու անգամ երկու՝

Մտածեցիք չո՞րս է...

Այդպե՜ս է ձեռնարկում

Սատանան իր որսը:

 

Փորձում է ու որսում

Ցանցով տարողունակ,

Մտքի խայծն է հոգուն

Կաշկանդում շարունակ:

Ահա, ես ուզեցի

Սոսկ փաստ բացահայտել,

Իսկ դուք շտապեցիք

Թվեր բազմապատկել:

 

Կեղծ թեզերը հաճախ

Ապրում են դարեդար,

Երբ մտնում են տաճար,

Կրկնվում բառ առ բառ:

 

Կրկնությունը բարի

Գիտելիքի մայրն է,

Բայց նաև ստերի

Ամրապնդման հայրն է):

Ուշքի՛ եկեք, հայե՛ր,

Ամո՜թ, անհարմա՜ր է․․․

Սթափվելու պահ է,

Խելքի գալու դար է։

Արթնանալու դար է,

Մեջքն ուղղելու դար է,

Մարտնչելու դար է

Եվ հաղթելու դար է։

Հետո Ոսկեդա՜ր է,

Հետո Ոսկեդա՜ր է․․․

Խաչիկ-Ապեր

11.11.2022թ.

ՄԻ՛ ՎԵՐԱԾՎԵՔ ԷՇ-ՆԱՀԱՏԱԿՆԵՐԻ

 Հայե՛ր, խուսափե՛ք էշ-նահատակ դառնալուց․․․

Ցանկալի է, որ ամենափոքր հնարավորության դեպքում Հայաստան վերադառնան ոչ միայն ռուսաստանաբնակ, այլ նաև ուկրաինաբնակ հայերը։ Ոչ մի հայ զինվոր չպետք է որևէ կողմից մասնակից դառնա ռուս-ուկրաինական արյունահեղ ու դաժան պատերազմին։ Ճիշտ է, մեզ համար խիստ ցանկալի է, որ Հայաստանի ոխերիմ թշնամի Ռուսաստանը պարտվի այդ պատերազմում և հիմնովին կազմաքանդվի, բայց պաշտոնական Ուկրաինան ևս առանձնապես բարեկամաբար չի տրամադրված Հայաստանի ու հայ ժողովրդի նկատմամբ։ Ուստի բոլորովին ցանկալի չէ, որ որևէ հայ, թեկուզ պատահաբար, դառնա այդ օտար պատերազմի զոհ։ Էլ ավելի ցանկալի չէ, որ երկու կողմից կռվող հայերը, թեկուզ անգիտակցաբար, կրակեն իրար վրա։

Ուրեմն, հայե՛ր, շուտափույթ վերադարձեք Հայաստան և մի՛ վերածվեք էշ-նահատակների։

Խաչիկ-Ապեր

09․11․2022թ․

ԴՐՈՇԻ ԼՈՒՍԻՆԸ

 ԴՐՈՇԻ ԼՈՒՍԻՆԸ

Թուրքն ի ծնե զավթիչ է,

Անշուշտ, ռուսը՝ նույնպես.

Որքան հող տաս, զիջես,

Կասեն՝ նեղ է, քիչ է:

Թուրքը չունի դարպաս,

Անշուշտ, ռուսը՝ նույնպես.

Ամբողջ աշխարհն էլ տաս,

Կասեն՝ չեղա՜վ, քիչ է:

Աչք կտնկեն Լուսնին՝

Դրոշն առաջ պարզած,

Ում ինչ բաժին հասնի՝

Կխլեն մի հատված,

Հետո կծածանեն

Դրոշի լուսինը.

- Մի երեսը մերն է,

Մյուսը՝ ռուսինը:

Չասե՛ք, թե չեն անի,

Մի՛ ասեք՝ չեն ասի.

Հիշենք Կարսը, Անին,

Հայոց սարը Մասիս:

Չմնա՛նք թույլ ու հեզ.

Մի դար առաջ չասի՞ն՝

- Գետերից դեսը՝ մեզ,

Գետերից դեն՝ ռուսին:

Խաչիկ-Ապեր

02.11.2022թ.

ԲԱԶՄԱԼԵԶՈՒ ԻՐԱԶԵԿՈՒՄ

ԱՐՑԱԽԸ (ՂԱՐԱԲԱՂԸ) ԵՐԲԵՔ ՉԻ ԵՂԵԼ ԵՎ ՉԻ ԼԻՆԵԼՈՒ ԱՆԿԱԽ ԱԴՐԲԵՋԱՆԻ ԿԱԶՄՈՒՄ

 

Арцах (Карабах) никогда не был и не будет в составе независимого Азербайджана

 

Artsakh (Karabakh) has never been and will never be part of the sovereign republic of Azerbaijan

 

L'Artsakh (Karabakh) n'a jamais fait et ne fera jamais partie de la république souveraine d'Azerbaïdjan

 

Artsakh (Karabakh) non è mai stato e non farà mai parte della repubblica sovrana dell'Azerbaigian

 

Artsakh (Karabaj) nunca ha sido y nunca será parte de la república soberana de Azerbaiyán

 

Artsakh (Karabağ) hiçbir zaman Azerbaycan'ın egemen cumhuriyetinin bir parçası olmadı ve olmayacak

 

Το Αρτσάχ (Καραμπάχ) ποτέ δεν ήταν και δεν θα είναι ποτέ μέρος της κυρίαρχης δημοκρατίας του Αζερμπαϊτζάν

 

არცახი (ყარაბაღი) არასოდეს ყოფილა და არც იქნება აზერბაიჯანის სუვერენული რესპუბლიკის ნაწილი

 

آرتساخ (قره باغ) هرگز بخشی از جمهوری مستقل آذربایجان نبوده و نخواهد بود

 

أرتساخ (كاراباخ) لم تكن ولن تكون أبدًا جزءًا من جمهورية أذربيجان ذات السيادة

 

阿尔扎赫（卡拉巴赫）从未也永远不会成为阿塞拜疆主权共和国的一部分

 

ԱՐՑԱԽԱՀԱՅՈՒԹՅՈՒՆԸ ՄՆԱՑ ՆՈՒՅՆ ԴԱՍԱՐԱՆՈՒՄ

 Հաշվի առնելով այն կարևոր հանգամանքը, որ Ստեփանակերտի Վերածննդի հրապարակում հավաքված բազմահազար արցախցիները բուռն ծափահարություններով հավանության արժանացրին ԱՀ խորհրդարանի կողմից այսօր ընդունված Հայտարարության կիսաճշմարիտ բոլոր թեզերը՝ համայն հայությունը պարտավոր է այս փաստն ընդունել որպես արցախահայության ազատ կամքի արտահայտություն և հարգել այն։

Անձամբ ես նույնպես՝ որպես հայության մի մասնիկը, հարգում եմ Արցախի հայության ազատ կամքի իրավունքն ու ընտրած կողմնորոշումը, թեև կասկած չունեմ, որ այդ կողմնորոշումը ոչ շատ հեռավոր ապագայում աղետալի հետևանքներ կունենա Արցախի և արցախահայության համար։

Պատկերավոր ասած՝ արցախահայությունը, նույն պատմական սխալները կրկնելու պատճառով, մնաց նույն դասարանում և ստիպված կլինի արյուն-քրտինք թափելով մի անգամ ևս անցնել նույն "կրթական" դասընթացը։ 

Սրտի ցավով եմ սա ասում, սակայն տիեզերական աստվածային օրենքներն անբեկանելի են։

Ոչ պակաս ցավալի էր ականատեսը դառնալ նաև այն տխուր իրողության, որ Արցախի՝ Մեսրոպ Մաշտոցի պատվավոր անունը կրող ուսումնական հաստատությունում բարձր պաշտոն ստանձնած արցախցի տիկինը հայերեն չգիտի և ստիպված էր հանրահավաքի բարձր ամբիոնից ռուսերեն լեզվով արտահայտել իր ասիմիլյացված մտքերը։

Խաչիկ-Ապեր

30․10․2022թ․   

Радостная Новость из Америки!

ՈՒՐԱԽԱԼԻ ԼՈՒՐ ԱՄԵՐԻԿԱՅԻՑ 

Սրտագին շնորհավորանքներս Վեհապետների ռուսազգի Դեսպանորդուհի Տատյանա Միկուշինային՝ «Morya» գրքի համար նման բարձր պարգևի արժանանալու առիթով:

Հայ ընթերցողներին տեղեկացնեմ նաև, որ Վեհապետ Մորիայի Ուղերձների հայերեն թարգմանությունների գիրքը Հայաստանում լույս է տեսել 2012 թ-ին՝ «Թողության Շնորհ» վերնագրով՝

Էլ Մորիայի կողմից ավելի ուշ տրված Ուղերձների (2012-2017 թթ.) հայերեն թարգմանություններն ընթերցողը կարող է գտնել այս բլոգի «Գիրք Իմաստության» բաժնում տեղակայված՝ նույնանուն գրքի էլեկտրոնային տարբերակներում:

Խաչիկ-Ապեր

25.10.2022թ.

ՍԱՏԱՆԻ ՔԱՄԻՆ ՈՒ ՄԱՐԱԳԸ

 ՍԱՏԱՆԻ ՔԱՄԻՆ ՈՒ ՄԱՐԱԳԸ

Սատանի քամին մարագին ասաց՝ դուռ-լուսամուտդ լայն բաց արա, դարման բերեմ լցնեմ։

Մարագը պատասխանեց՝ դու իմ միջի խոտը մի՛ տար, քո բերած դարմանն ինձ պետք չի։

Առակս զի՞նչ ցուցանէ - սատանի քամին ռուս-թուրքական դաշինքն է, մարագը՝ հայոց հողը։

Ո՜վ հայ մարդ, քո երկրի դռներն ու ականջներդ պինդ փակած պահիր ռուս-թուրքական դաշինքի շողոքորթ լեզվի դեմ։ Այն ոչ թե խաղաղություն է բերում քեզ, այլ՝ ավեր ու կոտորած։ Քանի՞ անգամ քո աչքով տեսնես, ականջովդ լսես, որ վերջապես հասկանաս․․․

Խաչիկ-Ապեր

19․09․2022թ․

ԱԶԱՏՈՒԹՅՈՒՆ ԱՊՍՏԱՄԲՆԵՐԻՆ

 ԱԶԱՏՈՒԹՅՈՒՆ ԱՊՍՏԱՄԲՆԵՐԻՆ

Ռսաթուրքական հակահայ դաշինքի շահերը սպասարկող ՀՀ նախագահ Սերժ Սարգսյանին պաշտոնանկ անելու նպատակով 2016 թ-ին ապստամբության դրոշ պարզած Սասնա ծռերը, որոնք կրեմլի պահանջով դատապարտվեցին և բանտ նետվեցին գաղութային երկրի կեղծ ու շինծու քրեական օրենքների հիման վրա, պետք է անհապաղ ազատ արձակվեն:

Խաչիկ-Ապեր

16.09.2022թ.