Սանատ Կումարա (Արամազդ) - Ուղերձ «Ժամանակը փոխվել է» ժողովածուից

Ժամանակը փոխվել է

ԵՍ ԵՄ Սանատ Կումարան. եկել եմ այս օրով, որպեսզի հայտնեմ աշխարհին այն նոր հնարավորության, նոր շնորհի մասին, որ Երկնոլորտները որոշել են հայտնի դարձնել աշխարհին մեր նոր ռուսազգի դեսպանորդ Տատյանայի միջոցով:

Շատերի համար անսպասելի կլինի իրադարձությունների ընթացքը: Եվ շատերը հակասական զգացմունքներ կապրեն՝ կարդալով սույն ուղերձը:

Սակայն մենք ոչ ոքի չենք ստիպում հավատալ կամ չհավատալ այն ամենին, ինչ կասվի: Մեր խնդիրն է՝ ձեզ տալ այս գիտելիքները, ձեր ազատ կամքը՝  դրանք ընդունել կամ չընդունել:

Ժամանակը փոխվել է, և սկսվել է Նոր Դարաշրջան: Աշխարհները մերձեցել են իրար: Եվ այն, ինչը մի քանի տարի առաջ՝ նույնիսկ անցած տարի, թվում էր անիրականալի երազանք, այժմ դառնում է իրականություն: Մենք հնարավորություն ենք ստանում խոսելու շատերի միջոցով, և օգտվում ենք այդ հնարավորությունից:

Իրադրությունը Երկրի վրա շարունակում է շիկանալ: Բարձրանում է մոլորակի թրթռումների մակարդակը: Նոր էներգիաներ են գալիս Երկիր: Եվ մարդկության մեծ մասը զգում է այդ էներգիաներն այն ձևով, որ անհնար ու անիմաստ է այլևս ընթանալ խավարում թափառելու այն արահետներով, որոնցով նա ընթանում էր երկար ու ձիգ հազարամյակներ:

Դա արտահայտվում է անբավարարվածության զգացման տեսքով՝ որպես սրտի կարոտ և ինչ-որ բանի սպասում, որն ուր որ է պետք է տեղի ունենա: Առավել զգայուն մարդիկ կորցրել են հետաքրքրությունն իրենց սովորական զբաղմունքների նկատմամբ: Թվում է՝ այն ամենն, ինչ առաջ կարևոր էր և կյանքի իմաստն էր կազմում, այժմ որևէ նշանակություն չունի: Բոլոր նախկին զբաղմունքները՝ դատարկ ժամավաճառությունն ընկերների հետ, անվերջ սերիալների դիտումը, մանր-մունր բաների հետևից ընկնելը, թվում է լրիվ անիմաստ են դարձել: Այդ ամենն արդեն հիշեցնում է երեկվա տոնից մնացած հետտոնական զարդարանք: Այսօր արդեն այդ ամենը զրկվել է իմաստից:

Առավել զգայուն մարդիկ իրենց սրտերում ունեն Նոր Աշխարհի կանխազգացումը՝ այն Աշխարհի, որը պետք է փոխարինի հնին ու իր դարն ապրածին: Եվ որքան էլ մարդկային գիտակցությունը փորձի կառչել կյանքի սովորական դարձած դրույթներից, հին ավանդույթներից՝ լինեն դրանք կրոնական, հասարակական թե ընտանեկան բնույթի, այդ ամենը կսրբվի-կտարվի վերահաս փոփոխությունների քամիով: Եվ միտք չունի դիմադրել այդ փոփոխություններին: Որովհետև այս աշխարհում ամեն ինչ ենթակա է Աստվածային բոլորապտույտի: Եվ ձեզ շնորհված ազատ կա՛մքն էլ իրականում սահմանափակված է իր ժամանակային և տարածական շրջանակներով:

Մատերիական աշխարհի շրջանակներով սահմանափակված մարդկային մահկանացու գիտակցությունը ենթադրում է, թե այս աշխարհում ամեն ինչ ենթակա է մարդու կամ մարդկային առաջնորդների կամքին:

Ո՜չ: Կա քարերը նետելու ժամանակ: Կա քարերը հավաքելու ժամանակ:

Եթե մարդկային օրգանիզմում բույն է դնում քաղցկեղային ուռուցքը, ապա առողջ օրգանիզմը սկսում է ազատվել հիվանդ բջիջներից: Ճիշտ նույնպիսի սկզբունք է գործում նաև այս տիեզերքում:

Եթե որևէ մարդկային քաղաքակրթություն կենտրոնացված է դառնում միայն անձնական հետաքրքրությունների բավարարման վրա, ապա այդպիսի քաղաքակրթությունը ենթակա է ոչնչացման, ճիշտ այնպես, ինչպես քաղցկեղային ուռուցքը կարող է հեռացվել վիրահատական ճանապարհով:

Եվ տվյալ դեպքում դիմադրությունն անօգուտ է: Այն ամենը, ինչ չի համապատասխանի Նոր Գիտակցությանը՝ Ընդհանուր Բարօրության, Բարու, Համագործակցության, Աստվածառաջնորդության սկզբունքներին, կսրբվի Երկրի երեսից այնպես, ինչպես ոչ վաղ անցյալի երկրաշարժն ու ցունամին հաշված ժամերի ընթացքում խլեցին մի քանի հազար մարդու կյանք:

Դադարե'ք ձգտել այս աշխարհում հաճույքներ ստանալուն: Կան անհամեմատ ավելի մեծ հաճույքներ, որոնք հասանելի են նրանց, ովքեր բացում են իրենց սիրտն ու միտքը Վերին Աշխարհների թրթռումների համար:

Ձեզնից դուրս չկա ոչինչ, ինչի կարիքն ունեք: Ամբողջ Աստվածային գիտելիքն ու կատարելությունը ձեր մեջ է: Փնտրե'ք այդ գանձը ձեր սրտում, փնտրե'ք դեպի ձեր մեջ եղած անհաշիվ հարստությունները տանող մուտքը:

Բայց մուտքի համար հարկ կլինի վճարել: Եվ մուտքի գինը ձեր էգոն է: Դուք պետք է հրաժեշտ տաք ձեր ես-ի անցողիկ մասին, ձեր էլեկտրոնային գոտու այն կուտակումներին, որոնք ճոպանների պես ձեզ կապկպում են  Երկրին, մոլորակի թանձր ոլորտին:

Եվ այն կարոտը, որ ձեզնից շատերն ապրում են, այն բանի ստույգ հայտանիշն է, որ դուք հոգնել եք  աշխարհիկ հաճույքներից,  որ պատրաստ եք նուրբ աշխարհների հետ շփմանը:

Այն ամենը, ինչ ձեզ անհրաժեշտ է՝ պարզապես ընտրություն կատարել և քայլել դեպի անսահմանություն՝ հրաժարվել երեկվա տոնական զարդարանքներից և քայլ կատարել դեպի իրականություն: Սկզբում՝ մեկ քայլ, հետո՝ երկրորդը: Եվ առանց կանգ առնելու գնալ դեպի ձեր իրական Գոյը, դեպի այն, ինչ իրականում կաք:

Ձեր սահմաններից դուրս չկա ոչինչ, որ հետ պահի ձեզ դեպի բարձր իրականաթյուն ձեր ընթացքից: Միայն ինքնե'րդ եք հետ պահում ձեզ:

Միթե՞ չեք կարող գլուխ հանել հազար-հազար վերամարմնավորումներով անիրական աշխարհում թափառող ձեր կրկնակից:

Դուք այլ Ճանապարհ չունեք: Կամ պետք է քայլ անեք դեպի անանց իրականություն, կամ պետք է վերջ տաք ձեր անհատականության գոյությանը:

Առողջ օրգանիզմն ինքն է ազատվում իր մեջ եղած քաղցկեղային բջիջներից: Պատկերավոր ասած՝ գտնվելով Աստծո որովայնում, բոլորդ կարծում եք, թե Աստված թու՞յլ կտա ձեզ ապրելու ձեր հորինած օրենքներով: Ո՜չ, ասում եմ: Նա պարզապես կազատվի այն ամենից, ինչը չի համապատասխանում Իր Կամքին և Իր Օրենքին: Մտածե'ք այն մասին, ինչ ասացի: Եվ ես հույս ունեմ ապագայում հանդիպել ձեզ հետ՝ այս դեսպանորդի միջոցով կամ ցանկացած ուրիշի միջոցով, ով կնախապատրաստի իր տաճարն ինձ որպես հյուր ընդունելու համար:

Սանատ Կումարա: ՕՄ

Տ. Ն. Միկուշինա, 4 մարտի, 2005թ.

Թարգմանեց Խ. Մանասելյանը