Էլ Մորիա - «Դուք պետք է գործեք, գործեք և էլի գործեք»

ԵՍ ԵՄ Էլ Մորիան՝ իմ դեսպանորդի միջոցով եկածս:

Հանգամանքների բերումով՝ այսօր ես ստիպված եմ կարճ ուղերձ-խրատ տալ: Ընկալե'ք այն ամենայն ուշադրությամբ ու լրջությամբ:

Շարադրանքի սեղմությունը նպաստում է դյուրահասությանը:

Հրատապությունն ստեղծում է անհրաժեշտ լարվածություն:

Տարածությունը լարված է: Հոսանքներն՝ ուժեղացված:

Լուրերը մեր աշխարհից ժամանակին են տրվում:

Եղե'ք զգոն: Պատրաստվեցե'ք գործողությունների:

Երկրային գործերի ընդհանուր անդորրը խաբուսիկ է: Սպասվում են փոփոխություններ, սպասվում են իրադարձություններ, որոնք կտպավորվեն իրենց թվացյալ դրամատիկությամբ ու անելանելիությամբ:

Սակայն՝ վերացնում ենք անպետքն ու իր դարն ապրածը: Հոգում ենք նորի ու առաջավորի մասին:

Նրանք, ովքեր մեզ հետ են իրենց մղումներով ու իրենց ծառայությամբ, անհանգստանալու բան չունեն: Նրանք, ովքեր լկտիաբար են վերաբերվում Աստվածային մտահղացմանը և իրենց համարում են Աստված, իրենց տեղը կդրվեն:

Չեմ ուզում ահաբեկել իմ ուղերձով: Ամեն ոք ստանում է այն, ինչին արժանի է, և յուրաքանչյուրը գիտե իր սրտում, թե որքանով են իր գործողությունները համապատասխանում Բարձրագույն Օրենքին:

Կա խիզախում Լույսի, երբ սպասավորներն իրենց ողջ էներգիան ուղղում են Ընդհանուր Բարօրությանը, Բարուն:

Կա խավար խիզախում, երբ անհատը մարտահրավեր է նետում Լույսի ուժերին և անմիջապես չպատժվելու հանգամանքն ընկալում որպես լուսավոր ուժերի անզորություն իր լկտիության հանդեպ:

Անկախ այն բանից, թե նման հայհոյախոսները որևէ կրոնի շրջանակներում են, թե գերադասում են իրենց մութ գործերն անել աշխարհիկ կառավարիչների ստվերում՝ նրանց ժամկետը սպառված է, և մոտենում է նրանց վարձահատույց լինելու ժամանակը:

Հրեշտակները խստորեն գրառում են բոլոր հայհոյախոսություններն ու բոլոր անաստված գործերը: Այլ ուղի ընտրելու հնարավորությունը միշտ էլ առկա է: Միշտ հնարավորություն կա զղջալու և հազանդորեն կրելու հասանելիք պատիժը:

Ամեն անգամ խոսում ենք, և ամեն անգամ չեն հավատում, որ իրենց կվերաբերվի: Մարդկային հիշողությունը կարճ է: Եվ, երբ գալիս է հաշիվը փակելու ժամանակը, զարմանում են. «Միթե՞ այդքան պարտքեր ունենք»:

Ըստ այդմ, նախքան պարտք անելը՝ մտածե'ք: Ժամանակը հոսում է անընդհատ ու անողոք: Աստվածային Էներգիայի հոսքն անկասելի է: Հնարավոր չէ կանգնեցնել և ժամանակը:

Ուստի լինելիության յուրաքանչյուր պահի մտորե'ք ձեր ուշադրության ուղղության մասին: Ուր ուղղված է ձեր ուշադրությունը, այնտեղ էլ հոսում է ձեր էներգիան: Եվ եթե դուք մի պահ կանգ առնեք և անկողմնակալ կերպով խորհրդածեք, թե ինչի մասին էիք մտածում օրվա ընթացքում, ապա սարսափը կպատի ձեզ: Ձեր ուշադրության 90 տոկոսը դուք բևեռել էիք բաների, որոնք նույնիսկ արժանի չեն ձեր մեն մի հայացքին:

Մտքերի և հույզերի նկատմամբ հսկողությունն այժմ ելում է առաջին պլան:

Հնար չկա հետաձգելու հատուցումը: Ձեր արարքների կարմայի վերադարձի ժամկետը կարճացված է: Դեռ ձեր մութ գործը չհասցրած անել՝ կստանաք հատուցումը: Եվ հարկ չի լինի որևէ մեկին հարց ուղղել. «Ինչի՞ համար, Տե'ր Աստված»:

Աշխարհի դաժան պայմանները ստիպում են թույլ տալ կոշտ և արագ պատասխան գործողություններ:

Ավարտվե'լ է երեխայության ժամանակաշրջանը: Եվ չի լինի արդեն այն հոգատար մայրիկը, որ իր վրա վերցնի ձեր հոգսի բեռը:

Արդեն հասուն եք, և հարկ կլինի պատասխան տալ ամեն մի արարքի, ամեն մտքի և գիտակցության մեջ թույլ տրված ամեն ինչի համար, ինչը չի համապատասխանում Աստծո Կամքին:

Նախքան նոր շինարարություն սկսելն անհրաժեշտ է մաքրել տարածքն ու շինհրապարակը:

Ա'յդ է հիմա մեր հոգսը, և այդտե'ղ ենք ջանքեր գործադրում: Տեսե'ք, զգո'ն եղեք, հանկարծ Աստվածային ավելի տակ չհայտնվեք...

Նախազգուշացնում եմ, որովհետև այս օրերին շատ բան ձեզնից է կախված: Նշանակություն ունի ոչ միայն ձեր վաստակը, այլ նաև երկկողմանի ջանքերի հարաբերակցությունը: Սպասելու ժամանակ չկա, երբ կարման փոխակերպության մեջ է: Ներկա Ժամանակի առանձնահատկությունն այն ամենի արագ վերադարձն է, ինչը կուտակված է: Չեք հասցնի աղոթք սկսել, արդեն կստեղծվի ձեր արագ արձագանքը պահանջող իրադրություն:

Միշտ հիշե'ք. դուք թեստեր եք անցնում և կարմա եք բեռնաթափում՝ անկախ այն բանից, որ անսպասելի իրադրության մեջ կարող եք և դրսևորել ոչ ճիշտ արձագանք: Դուք բեռնաթափում եք կարման և թեստեր եք անցնում, երբ ճիշտ դասեր եք քաղում այն իրադրությունից, որի հետ կյանքում բախվում եք:

Ես հետևում եմ իմ բոլոր խնամարկյալներին, ովքեր խնդրել են իմ հովանավորչությունն ու պաշտպանությունը: Բայց դա չի նշանակում, որ ես նրանց հեռու կպահեմ դժվարություններից ու անհաջողություններից: Աստված ամենամեծ փորձություններն առաքում է նրանց, ում հատկապես շատ է սիրում:

Քանզի միայն դժվարություններ հաղթահարելով է, որ դուք աճում եք, բազմապատկում ձեր ունակությունները, աճ ապրում գիտակցությամբ:

Կարևոր է ձեզ տալ այն խոչընդոտների ըմբռնումը, որոնք ձեզ հանդիպում են, և հարկ եղած պահին ձեզ հիշեցնել դրանց հաղթահարման կարևորության, անկոտրում կամքի, մղվածության և խիզախության մասին:

Իմ աշակերտների մեջ չկան նվնվացողներ ու ծույլեր:

Կասեմ. «Հապճեպ առա՜ջ»: Եվ բոլոր իմ աշակերտները պատրաստ կլինեն:

Կարելի է ընթացքու'մ գոտևորվել, և կարելի է ընթացքու'մ կողմնորոշվել, թե ինչպես ճիշտ գործել:

Ուստի զգո'ն եղեք: Ակնկալում եմ ձեզնից շարժունություն, հենց որ կանչեմ:

Մի' սպասեք, որ կգամ ու կգոռամ ձեր ականջին: Այլ նայեք իմ պատկերին, և կիմանաք, թե որն է անհետաձգելին, ինչը պետք է անել:

Դատարկ խոսակցությունների ժամանակ չկա: Ընթացիկ իրադրությունը գործողություններ է պահանջում:

Ըստ այդմ՝ դուք պետք է գործեք, գործեք և էլի գործեք. օգտագործեք Երկրի վրա գտնվելու ձեր ամեն մի րոպեն:

Խորհեցե'ք: Հազար տարի սպասել եք գործել սկսելու այս հնարավորությանը: Եվ ահա պահը հասել է: Հասել է գործելու ժամանակը:

Ուստի մի' տրտնջացեք, թե չեք հասցրել նախապատրաստվել, թե ծակ տրեխներով եք և բոլոր իրերը դեռ չեք հավաքել խուրջինի մեջ:

Դե'ն նետեք ձեր բոլոր իրերը: Ձեզ ոչինչ պետք չի գա, բացի ծառայելու ձեր ցանկությունից և ձեր սրտի կրակից:

Հոգ մի' տարեք այն մասին, թե ինչ կլինի վաղը կամ վաղը չէ մյուս օրը:

Մի' մտածեք այն մասին, թե ինչ է եղել երեկ և նախանցած օրը:

Դրանք խանգարում են ուղու վրա: Մտածեք միայն այն մասին, ինչ տեղի է ունենում հիմա և գործադրեք բոլոր ջանքերը հնարավորին չափ որակյալ ծառայություն իրականացնելու համար:

Մի' ստիպեք ինձ սուրհանդակ ուղարկել ձեզ մոտ, որ հիշեցնի ձեր առաքելության մասին: Բոլոր գիտելիքներն ու ողջ պլանը միշտ ձեզ հետ է՝ ձեր սրտերում:

Կասեմ. «Հապճե'պ»: Կասեմ. «Հրատա'պ»: Եվ կպահանջվի անել այն ամենը, ինչ պարտավոր եք անել: Ահա հենց հիմա է հասել այն պահը, հանուն որի դուք մարմնավորվել եք: Ամեն ինչ կարելի է փոխել: Գլխավոր աղբահանության ժամն է Երկրում: Ելեք ձեր գիտակցության ձեղնահարկերը: Իջեք ձեր մութ ցանկությունների նկուղները: Դուրս հանեք կեղտոտ սպիտակեղենը:

Ամեն ինչ կլվանանք, կմաքրենք, կչորացնենք:

Ձեր հին հագուստներից անմաքուր ու անլվա ոչինչ չի մնա:

Եվ մի' երկնչեք բաժանվել ձեր էգոիստական մտքերի ու զգացմունքների փալաս-փուլուսից:

Ամեն ինչ կվառվի ձեր ծառայության բոցի և ձեր սրտերի կրակի մեջ:

Անկատարությունը տեղ չունի նոր աշխարհում:

Ասում եմ ձեզ՝ լուսաբացը մոտ է. պահն է վեր կենալ ու գործել:

Նոր ժամանակներ են գալիս... Դիմավորե՜ք...

ԵՍ ԵՄ Էլ Մորիան,

դիմեցի իմ հավատարիմ աշակերտներին

«Թողության Շնորհ» Ուղերձների ժողովածու,

Երևան, 2012